ШЫМКЕНТ: «Бақытты жанұя» орталығы өткен жылы 25 мыңнан адамға қызмет көрсеткен

Орталыққа жүгінген тұрғындар психологиялық, медиаторлық, құқықтық кеңес алу, атаулы әлеуметтік көмекке құжат тапсыру, медициналық сараптама, тұрғын үй кезегіне тұру, Egov.kz порталы арқылы қызмет алу сияқты түрлі көмектер алды. Сонымен қатар, әлеуметтік жағынан аз қамтылған отбасыларға 225 іс-шара ұйымдастырылып, 5 794 ана тартылды. Бұл іс-шаралар аясында 2 879 анаға түсіндірме жұмыстары жүргізіліп, 160 құжат тиісті мекемелерге жіберілді. 2 755 анаға сүйемелдеу көрсетілді.

Отбасындағы мәселелер бойынша 2 459 азаматшаға заңгерлік және психологиялық көмек көрсетілді. Оның ішінде психологтар 727 азаматшаға депрессия, отбасы арасындағы түсінбеушілік, өз-өзіне қол жұмсау, балалармен қарым-қатынас, лудомания мәселелері бойынша көмек көрсетті.

Өткен жылы басқарма мен полиция арасында отбасындағы зорлық-зомбылықтың алдын алу бағытында іс-шаралар жоспары бекітілді. Нәтижесінде, жергілікті полиция инспекторлары 29 агрессорды «Бақытты жанұя» орталығында психологтың көмегіне жіберді. Психологтар мен заңгерлер агрессорлар мен жәбірленушілермен жеке жұмыс істеп, 17 азамат ортақ бітімгерлікке келіп, отбасымен татуласты. Қалған 12 азаматпен жұмыс жоспарланып, атқарылуда.

Орталық көпбалалы және әлеуметтік жағдайы төмен отбасылардағы аналарға кәсіптік дағдыларды меңгерту үшін 10 тегін курс ұйымдастырды. 2024 жылы ұсынылған курстар: киім пішу және тігу, қолөнер құрақ тігу, компьютерлік курстар, шаштараз, SMM, маникюр-педикюр, дефектолог-логопед, ересектер мен балаларға арналған массаж, кірпік жалғау.

Жыл бойы 1347 ана курстарға тіркеліп, 406 ана білім алып, 281 ана сертификат алды. 125 ана сертификатсыз білімдерін жетілдірді, ал 2790 кеңес берілді. Тігін курсын аяқтаған аналар жәрмеңкеде өз туындыларын сату арқылы қосымша табыс табуда.