ШЫМКЕНТ: қала әкімінің орынбасары көлеңкелі бизнес нысандарына қатысты пікір білдірді

Шымкент қаласы әкімдігінің ресми өкілі, қала әкімінің орынбасары Сәрсен Абайұлы Құранбек БАҚ өкілдерінің қатысуымен арнайы брифинг өткізді.

Өңірлік коммуникациялар қызметі алаңында өткен брифинг барысында Сәрсен Абайұлы қаладағы №8 мектеп маңындағы сауна туралы тараған ақпарат бойынша пікір білдірді. Осы ақпаратқа қатысты қазір Шымкент қаласы Полиция департаментінің өндірісінде Қылмыстық кодекстің 309-бабы 2-бөлігі 1-тармағымен жезөкшелікпен айналысу үшін притон ұйымдастыру және оны ұстау, жеңгетайлық фактісі бойынша тіркелген қылмыстық іс тергеліп жатыр. Бұл мекенжайларда жүргізілген тінту шаралары барысында Тәуке хан даңғылы, 60/7-үйде орналасқан 32 пәтердің барлығы монша және қонақүй кешені ретінде қайта жабдықталғаны және онда интимдік қызметтер көрсетілгені анықталды. Қылмыстық іс аясында сауна қызметкерлері күдікті деп танылып, үшеуі қамауға алынды.

Биыл 2 ақпанда ГАСК басқармасы, СЭС, Оңтүстік Жарық Транзит және ТЖД қызметкерлерінің қатысуымен де кешенді тексеру жүргізілді. Тексеру барысында Әкімшілік құқық бұзушылық туралы кодекстің 316-бабының талаптары бұзылғаны анықталды. Осыған байланысты «Арман-1» саунасының қызметі тоқтатылып, нысан мөрленді. Осы баппен әкімшілік құқықбұзушылық туралы хаттама толтырылып, Шымкент қаласының әкімшілік сотына жолданды. Үш күдіктіге қатысты айыптау актісі жасалып, іс әрі қарай зерделеу және сотқа жолдау үшін қалалық прокуратураға жіберілді.

- Мұндай құқық бұзушылық пен бассыздыққа қаламызда заң аясында тұрақты тексеру жүргізіліп, тиісті шаралар қолданыла береді. Себебі қоғамдық тәртіпті сақтап, қылмысқа қарсы күрес шарасын қабылдау қала тыныштығын қорғаудың кепілі, - деді С.Құранбек.