Шымкент қаласында көркем гимнастикадан халықаралық деңгейде жарыс өтіп жатыр

Көркем гимнастикадан Шымкент қаласының ашық чемпионатына 400-ден аса спортшы 3 жас ерекшелік бойынша жекелей және топтық жаттығу бойынша қатысуда. Ашылу салтанатында сөз алған Шымкент қаласы көркем гимнастика федерациясының Президенті Муслим Шаназаров қатысушыларға жеңіс пен сәттілік тіледі.

— Бұл сайыста кіл мықты қыздарымыз бақ сынайды. Жастар біріншілігінің жүлдегерлері де топқа түспек. Шымкент қаласының абыройын асқақтатады деген сеніміміз мол, - деді федерация басшысы.

Жарыстың негізгі кезеңі басталғанда көрініс алаңына көркем спорттың сайдың тасындай іріктелген сұлулары жекелей де, топпен де шығып, бірінен бірі асып түсіп жатты. Әр қимылын еппен иіліп, түрлі жаттығу комбинацияларын керіліп, созылып жасаған жасөспірімдерге жәй қарап тұрудың өзі көз сүйсінерлік керемет көрініс. Бір сызықтың бойында тұрғандай, аяқ-қолы бүгілмей, артық-кем жүрмей, қолындағы құралын құлатып алмаса деген жанкүйерлер де жетерлік. Төрт күнге созылатын көркем спорт додасы үйлесімді дене тәрбиесін тағы бір айшықтамақ.