​Шымкент қаласында МӘМС жүйесіне дербес төлеушілер саны артқан

Халықты міндетті әлеуметтік медициналық сақтандыру жүйесінде қамтамасыз ету және сапалы медициналық көмек көрсету бойынша осы және өзге де өзекті мәселелер қалалық денсаулық сақтау басқармасының басшысы Нұрлыбек Асылбеков пен ӘМСҚ Шымкент қаласы бойынша филиалының директоры Ляззат Алимова және қаладағы барлық жауапты басқармалар мен құзырлы мекемелердің және барлық медициналық ұйым басшыларының қатысуымен өткен аймақтық штаб отырысында айтылды.

Жиында тұрғындарды медициналық сақтандыру жүйесінде қамту және сапалы медициналық қызмет көрсету мәселелері кеңінен талқыланып, жауапты шешімдер қабылданды.

Штаб отырысында «Әлеуметтік медициналық сақтандыру қоры» КЕАҚ Шымкент қаласы бойынша филиалының директоры Ляззат Алимова атқарылып жатқан жұмыс барысын баяндап, МӘМС жүйесінің артықшылықтарын атап өтті. Сондай -ақ МӘМС және тегін медициналық көмектің кепілдендірілген көлемі пакеттерінің бірыңғай пакеті туралы түсіндірілді.

Міндетті әлеуметтік медициналық сақтандыру қазіргі уақытта тұрғындар арасында сұранысқа ие болып, денсаулық сақтау саласында оң нәтижелерге қол жеткізуге мүмкіндік беріп отыр. МӘМС аударымдары мен жарналары түспейтін азаматтар да тегін кепілдендірілген медициналық көмектің кепілді көлемі (ТМККК) аясында медициналық қызметтерді ала алады.

Атап айтқанда, жедел медициналық көмек (оның ішінде медициналық авиация); алғашқы медициналық-санитариялық көмек; созылмалы және әлеуметтік маңызы бар аурулары бар пациенттерді динамикалық байқау; шұғыл медициналық көмек; созылмалы және әлеуметтік маңызы бар аурулар кезінде күндізгі, тәулік бойы және үйдегі стационарда медициналық көмек; туберкулез кезінде оңалту және 1 кезеңді оңалту; донорлық; дәрі-дәрмекпен қамтамасыз ету қызметтері қарастырылған.