Талдау нәтижесінде идеологиялық тұрғыдан ескірген атауларды заманауи әрі тарихи әділеттілік тұрғысынан өзгерту, сондай-ақ атауы жоқ көшелерге жаңа атаулар беру жұмыстары қолға алынған.
Шымкентте мәдениет, тілдерді дамыту және архивтер басқармасы қаладағы әкімшілік-аумақтық бірліктер мен мемлекет меншігіндегі нысандарға атау беру және қайта атау жұмыстарын қолданыстағы заңнамаға сәйкес жүргізіп келеді.
Бұл жұмыстың негізгі мақсаты – тарихи жадыны жаңғырту, ұлттық бірегейлікті нығайту және көше атауларындағы жүйесіздікті жою.Бұл туралы бүгін Шымкент қаласының Өңірлік коммуникациялар қызметінің ақпарат алаңында өткен брифингте қала әкімінің орынбасары – Сәрсен Абайұлы Құранбек мәлімдеді.
Шымкент қаласында жалпы 3 865 көше бар. Оларға жүргізілген талдау нәтижесінде көше атауларындағы келесідей жағдайлар анықталды:
- Тарихи және дәстүрлі атаулар: 2 704 көше (бұл қаланың тарихи мұраға деген құрметін көрсетеді).
- Тұлғалардың есімдері: 988 көше.
- Ескірген атаулар: 226 көше атауы идеологиялық тұрғыдан ескірген.
- Атауы жоқ көшелер: 173 көшеге әлі күнге дейін атау берілмеген.
- Қайталанатын атаулар: 44 көшенің атауы бір-бірін қайталайды, бұл логистикалық кедергілер туғызады.
Талдау нәтижесінде қала басшылығы идеологиялық тұрғыдан ескірген атауларды заманауи және тарихи әділеттілік тұрғысынан өзгертуді, сондай-ақ атауы жоқ көшелерге жаңа атаулар беруді қолға алды.Қала әкімдігінің мәліметінше, 2025 жылы Ұлы Жеңістің 80 жылдығына орай ерекше жұмыстар жоспарланған. Осы мерейтой аясында 20 тұлғаның есімін беру ұсынылып, оның 10-на тиісті мемлекеттік органдардан келісім алынған. Бұл бастама Ұлы Отан соғысы ардагерлерінің ерлігін мәңгі есте қалдыруға бағытталған.
Биылғы жылы (2025 жыл) Шымкенттің бірнеше ауданында (Абай, Әл-Фараби, Еңбекші және Қаратау) нақты өзгерістер орын алды:
- 11 көше мен 1 аллеяға жаңа атау берілді.
- 8 көше қайта аталды.
- 11 атау – жер-су және дәстүрлі тарихи атауларға негізделген.
- 9 атау – Ұлы Отан соғысы ардагерлерінің есімдерімен байланысты.
Қазіргі таңда алдағы екі жылға арналған ауқымды жұмыс жоспары әзірленді. Қаладағы 465 көшеге қатысты 2026–2027 жылдарға арналған жол картасы әзірленіп, ҚР Мәдениет және ақпарат министрлігінің қарауына ұсынылды. Бұл кешенді жоспар қаладағы атаулар жүйесін толықтай ретке келтіруге мүмкіндік береді.Сәрсен Абайұлы Құранбек бұл жұмыстың тек техникалық өзгеріс емес, тарихи жадыны жаңғырту мен ұлттық бірегейлікті нығайтуға бағытталған маңызды мемлекеттік бастама екенін атап өтті.
