ЖАС БУЫН – ЖАҢА ӨМІР БАСТАУЫ
Бүгін Шымкент қаласындағы Мирас колледжінің жастарымен маңызды кездесу өтті.
Шараның басты мақсаты – қоғамдық келісім мен жалпыұлттық бірлікті насихаттау, жас ұрпақтың қоғамдағы жауапкершілігін арттырып, олардың саналы азамат ретінде қалыптасуына ықпал ету.
Кездесуге Шымкент қалалық Ішкі саясат және жастар ісі жөніндегі басқармасының «Қоғамдық келісім» КММ-нің бөлім басшысы Азиза Исаева, «Дін мәселелерін зерттеу орталығы» КММ-нің теолог маманы Таңшолпан Мұхтарқызы, сондай-ақ «Жастар ресурстық орталығының» маманы Жансая Аманбаева арнайы қатысып, жастарға елдегі бейбітшілік пен татулықтың маңыздылығы туралы кеңінен мағлұмат берді.
Кездесу барысында студенттерге деструктивті теріс діни ағымдардың зардаптары, ұлттық тәрбие мен отбасылық құндылықтардың қоғамдағы рөлі жайында маңызды ақпарат ұсынылды. Сонымен қатар, «Қоғамдық келісім» КММ бөлім басшысы Азиза Исаева қазіргі жастар арасындағы өзекті мәселелердің бірі – лудомания (құмар ойындарға тәуелділік) туралы сөз қозғап, оның жеке адам мен қоғамға тигізетін зиянды әсерін атап өтті.
«Лудомания – адамның өміріне, отбасына, білім алуына және болашағына үлкен қауіп төндіретін қауіпті құбылыс. Өкінішке қарай, құмар ойындарға тәуелділік жастар арасында да жиі кездеседі. Бұл – тек қаржылық шығын емес, сонымен қатар психологиялық және әлеуметтік қиындықтарға әкелетін дерт. Сондықтан әрбір жас саналы түрде өз уақытын тиімді пайдаланып, өмірлік құндылықтарды дұрыс бағалауы қажет,» – деді Азиза Исаева.
Сарапшылар жастардың өмірлік ұстанымдары мен саналы таңдау жасауы туралы ой қозғап, олардың өз болашағына деген жауапкершілігін арттыруға бағытталған мазмұнды әңгіме өрбітті. Жиын соңында студенттер белсенділік танытып, көкейлеріндегі сұрақтарын қойып, тұщымды жауап алды.
![](/assets/thumbnails/43/439f126e001c1cb0b1c2f9a57b1f21df.jpg ""Жетім жігітке күйеуге тисем екен" деп армандадым"")
