Қазіргі таңда Шымкент қаласында 81 елді мекеннің 80-інде ауыз су жүйесі жүргізілген. Қаладағы маңызды жобалардың бірі — Құрсай шағынауданындағы ауыз су жүйесінің құрылысын дамыту болып отыр.
Бұл туралы бүгін Өңірлік коммуникациялар қызметі алаңында өткен брифинг барысында Шымкент қаласы әкімдігінің ресми өкілі, қала әкімінің орынбасары - Сәрсен Абайұлы Құранбек баяндады.
Әкім орынбасарының сөзінше, жоба екі кезеңнен тұрады, және құрылыс жұмыстары 2021 жылы басталған. Бүгінде 98%-дан астам су жүйелері салынған, ал жобаның толық аяқталуы 2025 жылға жоспарланған. Биылғы жылы қалада бірнеше нысанның құрылысы аяқталды, соның нәтижесінде 27 мыңға жуық тұрғын ауыз су жүйесіне қосылып, ауыз сумен қамту деңгейі 99%-дан 99,5%-ға өсті. 2024 жылы 10 нысанның құрылысы жүргізілді, олардың ішінде Сайрам, Бозарық, Қайтпас-1 елді мекендеріндегі ауыз су жүйелерінің құрылысы бар. 2025 жылы 4 нысанның құрылысы жалғасып, аяқталуы күтілуде. Бұл жұмыстардың нәтижесінде қаланың көптеген бөліктерінде ауыз су жүйесін жақсарту көзделген. 2025 жылы жаңа жобалар да іске қосылады, оның ішінде Қызылжар-2 елді мекенінде ауыз су жүйесі құрылатын болады. Сонымен қатар, қаладағы жаңа құрылыс аумақтарында да ауыз су жүйелерін дамыту бойынша жұмыстар жоспарланып отыр. Дегенмен, қалада ауыз су жүйесі жүргізілген кейбір елді мекендерде мәселе туындап отыр. Мысалы, Текесу және Айкөл ауылдарында су ұңғымаларынан алынған су кермектігі жоғары, ішуге жарамсыз болып шықты. Текесу елді мекенінен ауыз су Түркістан облысынан, яғни Абай-Текесу су көзінен уақытша жеткізіліп отыр. Бұл мәселені шешу үшін, Энергетика басқармасының қолдауымен Текесу және Жұлдыз ауылдары арасындағы 13,8 км су құбыры жүргізілуде. Айкөл елді мекенінде де су ұңғымасынан алынған су жарамсыз болып, қазір тұрғындар Құрсай аумағынан тасымалданып жатқан суға тәуелді.
![](/assets/thumbnails/43/439f126e001c1cb0b1c2f9a57b1f21df.jpg ""Жетім жігітке күйеуге тисем екен" деп армандадым"")
