Биыл бұл бастама жалғасын тауып, қосымша 23 елді мекенге талшықты-оптикалық интернет желісін тарту бойынша жеке инвесторлармен меморандум жасалды.
Шымкент қаласында цифрлық инфрақұрылымды дамыту және қала тұрғындарын, әсіресе шалғай орналасқан аумақтарды жоғары жылдамдықты интернет желісімен қамту бағытындағы жұмыстар жүйелі түрде және үлкен қарқынмен атқарылып келеді.
Бұл бастама қаланың цифрлық теңсіздікті жоюға және барлық тұрғындар үшін ақпараттық технологияларға қолжетімділікті қамтамасыз етуге деген ұмтылысын көрсетеді.
Бұл туралы бүгін Өңірлік коммуникациялар қызметі алаңында өткен брифингте Шымкент қаласы әкімдігінің ресми өкілі, қала әкімінің орынбасары Сәрсен Абайұлы Құранбек тарқатып айтып берді.
Оның мәлімдеуінше, 2021 жылдан бастап жеке инвесторлардың белсенді қатысуымен қаладан шалғай орналасқан 60-қа жуық елді мекен талшықты-оптикалық байланыс желісіне қосылды. Осы ауқымды жұмыстардың нәтижесінде 500 мыңға жуық тұрғын жоғары жылдамдықты, сапалы интернетті пайдалану мүмкіндігіне ие болды, бұл білім беру, денсаулық сақтау және бизнес салаларына оң әсерін тигізді.
Биыл бұл бастама табысты жалғасын тауып, қосымша 23 елді мекенге талшықты-оптикалық интернет желісін тарту бойынша жеке инвесторлармен арнайы меморандум жасалды. Бүгінгі таңда осы 23 елді мекеннің ішінен 13 елді мекеннің – олар Жайлау, Көксай, Азат, Химфарм, Ынтымақ-2, Қатын көпір, Орманшы, Қорғасын, Сайрам, Айнатас, Құлагер, Жасдәурен және Ақтас-2, Мәртөбе – тұрғындары интернетке қосылу мүмкіндігіне ие болды. Қалған 10 елді мекеннің 8-інде – олар Тәуелсіздікке 20 жыл, Ынтымақ-2, Көкбұлақ, Алтынтөбе, Қаратөбе, Нұршуақ, Жиделі, Тұрлан – кең жолақты интернет желісін қосу жұмыстары қараша айында толық жүзеге асырылмақ. Ал Исфиджап пен Қайнарбұлақ елді мекендерін желіге қосу жұмыстары желтоқсан айында аяқталады деп жоспарлануда.
Аталған шаралардың нәтижесінде Шымкент қаласының барлық тұрғындары үшін заманауи, жылдам әрі тұрақты интернет қызметіне қол жеткізу мүмкіндігі кеңейіп, мегаполистің цифрлық даму деңгейі жаңа сапалық кезеңге көтеріліп, «Ақылды қала» тұжырымдамасын жүзеге асыруға негіз болады.
