Шымкентте өрт-профилактикалық түсіндірме жұмыстары жүргізіліп жатыр

Шымкент қаласында тұрғындар арасында өрт-профилактикалық түсіндірме жұмыстары жүргізілуде, деп хабарлайды ERNUR.KZ.

Шымкентте 15 тамыздан бастап өрт қауіпсіздігі айлығы жарияланған болатын. Айлық аясында Еңбекші ауданы тұрғындары арасында өрт-профилактикалық түсіндірме жұмыстары жүріп жатыр.

Аталған іс-шараға аудан әкімі, депутаттар, газ техникалық қызметі, төтенше жағдай басқармасының мамандары қатысып, елді мекендегі аса проблемалық аумақтардың тұрғындарына өрттің алдын алу және жабдықтарды қолданудағы ережелерді қатаң сақтауды ескертті.

– Аудан тұрғындарын алдын ала өрт қауіпсіздігінен сақтандырып, пештердің жағдайын тексеріп, кеңес беру – біздің міндетіміз. Түсіндіру шаралары ең алдымен көп балалы отбасылар, мүмкіндігі шектеулі жандар арасында жүргізіледі,- деді аудан әкімі Досбол Күздікбайұлы.

– Тұрмыста ас үйде газ балонды қолданатындар көп. Оны пайдаланудың ережесін орындамағаннан адамдар улануы мүмкін. Улы газ иіссіз, түссіз болып келеді. Сондықтан оны иісін көпшілік сезбейді. Газ шыққан жағдайда осы автоматты түрде газоанализатор сигнал береді. Бұл төтенше жағдайдың алдын алудың бірден-бір жолы, - деді Еңбекші ауданының төтенше жағдай басқармасының аға инженері, азаматтық қорғау капитаны Ақмырза Бабаш.

– Бүгін Көксай-2, Көксай-3 көшелеріндегі жеке тұрғын үйлердің жалпы тығыз орналасуына байланысты өрт тактикалық оқу-жаттығу өткізілді. Жақын әрі қатар орналасқан үйлерде өрт тұтанған жағдайда тез ұлғайып кетуі мүмкін. Сондықтан, өрт бола қалған жағдайда қандай әрекетке көшу керектігі жайында тұрғындарға кеңес те берілді, - деді Еңбекші ауданының төтенше жағдайлар басқармасының бастығы, азаматтық қорғау полковнигі Қайрат Сәрсенбаев.

Төтенше жағдайлар басқармасы мамандары өрт тактикалық оқу-жаттығу жылына екі рет ұйымдастырылатынын айтып өтті.

– Біздің жұмысымыз – қауіпсіздікті қадағалау. Ең бірінші тұрғындар жауапты мекемелермен келісімшартқа отыру керек. Келісімшарт бойынша қызметкерлер айына екі рет тексереді. Егер де, бір ақау болатын болса, газ техникалық инспекциясын шақырады, – деді газ техникалық инспекциясының бас маманы Нұрлан Көшкенбаев.

Айта кетейік, аталған акция аясында өрт қауіпсіздігінің алдын алу туралы тұрғындарға парақшалар таратылды.