Шымкентте теңге ілуден III Азия кубогі өтеді

03.04.2025 11:36

357

Шымкент қаласында 5-6 сәуір күндері теңге ілуден III Азия Кубогы өтеді.

Дәстүрлі жарысты Қазақстан Республикасы Туризм және спорт министрлігі Спорт және дене шынықтыру істері комитеті, Қазақстан Республикасы Ұлттық спорт қауымдастығы және Шымкент қаласының әкімдігі ұйымдастырып отыр.

Кубокта Қазақстан құрамасының 4 спортшысы ел намысын қорғаса, сондай-ақ Қазақстан, Өзбекстан, Қырғызстан, Түркіменстан, Тәжікстан, Моңғолия, Қытай және Ресейден келген 50-ге жуық спортшы бақ сынайды.

Жарысқа 18 жастан асқан ересек спортшылар қатысады. Ашылу салтанаты 5 сәуір күні сағат 12:00-де өтеді. Спортшылар «Жеті құт», «Бес белес» стильдерінде сынға түседі, ал 6 сәуір күні «Қос құлаш» стилінің жеңімпазы анықталып, үш стиль бойынша ең мықты «Үздік теңге ілуші» атағы сарапқа салынады.

Теңге ілуден Азия Кубогы қатарынан үшінші жыл өткізіліп отыр. Бұл бәсеке ұлттық спорттың халықаралық деңгейде дамуына ықпал етуде.