Соңғы үш жылда Шымкент қаласының денсаулық сақтау жүйесінде елеулі өзгерістер болды

Шымкент қаласының денсаулық сақтау саласы айтарлықтай өзгерістерді бастан өткеріп, дамудың жаңа кезеңіне қадам басты. Мемлекет басшысының денсаулық сақтау саласын жетілдіру жөніндегі нақты тапсырмаларына сүйене отырып, қала әкімдігі, медицина ұйымдары және мамандар бірлесе отырып ауқымды жұмыстар атқарды. Нәтижесінде медициналық қызметтің сапасы, қолжетімділігі мен заманауи деңгейі айқын өсті. Бұл – барлық мүдделі тараптардың үйлесімді жұмысы мен жауапкершілігінің арқасы болды деуге әбден негіз бар.

1. Медициналық көрсеткіштердің тұрақты жақсаруы
Соңғы жылдары қаладағы негізгі медициналық индикаторлар оң бағытта өзгерді. Әсіресе, ана мен бала өлімі көрсеткішінің айтарлықтай төмендеуі ерекше назар аударарлық. Бұл жетістік алғашқы медициналық-санитариялық көмектің сапасын арттыру, тәжірибелі мамандарды даярлау, ауылдық және қалалық емханалардың материалдық-техникалық базасын нығайту жұмыстарының тікелей нәтижесі болып отыр.

2. Тарихи деңгейдегі оқиға – министрлік алқасы Шымкентте
2025 жылдың 30 мамырында алғаш рет ҚР Денсаулық сақтау министрлігінің Алқа отырысы Шымкент қаласында өтті. Бұл – еліміздің үшінші мегаполисінің медициналық инфрақұрылымына деген жоғары сенім мен оң бағаның дәлелі. Мұндай деңгейдегі шараның өткізілуі қала дәрігерлерінің еңбегіне берілген зор құрмет болды.

3. Қала медицинасын дамытуға арналған тұжырымдама
Шымкенттің денсаулық сақтау жүйесін кешенді түрде жетілдіруге бағытталған даму Концепциясы бекітілді. Бұл құжатта нақты индикаторлар мен орындалу мерзімдері белгіленген. Жоспарға сәйкес, медициналық қызмет сапасын арттыру, білікті кадрларды тарту, инновациялық технологияларды енгізу бағытында жүйелі жұмыстар жалғасуда.

4. Халықаралық стандарттарға қадам
Шымкент қаласы Дүниежүзілік денсаулық сақтау ұйымының Еуропалық «Салауатты қалалар» жобасына қосылу жолында. Бұл бастама қала тұрғындарының өмір сапасын арттыру, денсаулық мәдениетін қалыптастыру және қоғамдық денсаулық көрсеткіштерін жақсартуға бағытталған.

5. Қаржылық тұрақтану – сапалы қызмет кепілі
2022 жылы жиналған 3,5 млрд теңге қарыз толық өтелді. Соның ішінде №1 қалалық аурухана – 2,5 млрд теңге, №2 қалалық аурухана – 860 млн теңге берешектен құтылды. Қаржылық тұрақтылықтың нәтижесінде 2025 жылы медицина қызметкерлеріне қосымша сыйақылар төленіп, олардың әлеуметтік жағдайын жақсартуға мүмкіндік туды.

6. Аккредитациядан өткен ұйымдар санының өсуі
Егер 2022 жылы қалада небәрі 8 медициналық ұйым аккредитациядан өтсе, 2025 жылы бұл көрсеткіш 53-ке жетті. Бұл – қаланың медициналық мекемелерінің 60%-ы сапа мен қауіпсіздік талаптарына толық сәйкес келетінін білдіреді.

7. Үлгілі тәжірибе орталықтарының ашылуы
№6, №3, №1 және №7 қалалық емханаларда заманауи үлгіде тәжірибе алмасу орталықтары құрылды. Мұнда 200-ден астам аймақтық медицина қызметкерлері тәжірибе алмасып, кәсіби біліктілігін арттырды.

8. Госпитальдық фармацияның енгізілуі
8 медициналық ұйым базасында госпитальдық фармация бөлімдері ашылып, дәрі-дәрмек айналымы тиімді басқарылды. Соның нәтижесінде 74 млн теңге үнемделді, ал 2025 жылдың соңына дейін бұл сома 200 млн теңгеге жетеді деп күтілуде.

9. Жедел жәрдем қызметінің күшеюі
2024–2025 жылдары қалаға 50-ден астам жаңа жедел жәрдем көлігі алынды. Бұл шұғыл медициналық көмектің жылдамдығы мен қолжетімділігін едәуір арттырды. Жыл соңына дейін тағы 50 көлік сатып алу жоспарланып отыр.

10. Дәрігерлердің халықаралық деңгейде біліктілігін арттыруы
2023 жылдан бастап 224 маман шетелде оқып, заманауи медициналық әдістерді меңгерді. Сонымен қатар 120-дан астам қызметкер шеберлік сабақтарына қатысып, кәсіби деңгейін көтерді. 2025 жылы тағы 116 маманды шетелде, 120 маманды ел ішінде оқыту жоспарланған.

Қорыта келгенде, 2022–2025 жылдары атқарылған жұмыстар – Шымкент қаласының денсаулық сақтау жүйесін түбегейлі жаңартып, сапаның жаңа деңгейіне көтеруге бағытталған кешенді өзгерістер. Бұл табыстар – әрбір дәрігердің, орта буын медицина қызметкерлерінің және әкімдіктің бірлескен еңбегінің жемісі. Қаланың медициналық жүйесі болашақта да халық денсаулығын қорғауда және өмір сапасын арттыруда көшбасшы бағыттардың бірі болып қала беретіні анық.