ТҮРКІСТАН: Бәйдібекте көгалдандыру жұмыстары қарқын алды

Бәйдібек ауданында көгалдандыру жұмыстары қарқын алды, деп хабарлайды ERNUR.KZ.

Бүгін Бәйдібек ауданының орталығы Шаян елді мекеніне кіреберіс Шаян – Екпінді бағытының жол бойында көгалдандыру жұмыстары жүргізілді. Аудан әкімдігінің бастамасымен қолға алынған бұл шара экологиялық ахуалды жақсартуға және ауданды көркейтуге бағытталған.

Жол бойындағы белгіленген аумақ арнайы қоршалып, тұя, терек, үйеңкі және басқа ағаштардың 1 300 түбі отырғызылды. Алдағы уақытта бұл жұмыстар жалғасып, жалпы 5 500 түп ағаш отырғызу жоспарланып отыр.

Аталған шараға Бәйдібек ауданының әкімі Ерлан Нұрмаханов арнайы қатысып, алғашқы көшеттерді отырғызуға атсалысты. Көгалдандыру жұмыстарының маңыздылығына тоқталып, аудан тұрғындарын табиғатты аялауға, жасыл желекті күтіп-баптауға шақырды.

– Жасыл желек – табиғаттың байлығы, адамзаттың аманаты. Ағаш отырғызу тек қоршаған ортаны қорғау ғана емес, келешек ұрпаққа жасалған игі іс. Сондықтан бұл жұмыстар алдағы уақытта да жалғасады, – деді аудан басшысы.

Ауданды көгалдандыру жұмыстарына жергілікті тұрғындар мен мекеме қызметкерлері белсене қатысуда.