ТҮРКІСТАН: Кентауда ардагерлерге құрмет көрсетілді

Облыс әкімінің орынбасары мен Кентау қаласының әкімі ардагерлерді мерекемен құттықтады, деп хабарлайды ERNUR.KZ.

Облыс әкімінің орынбасары Бейсен Тәжібаев пен Кентау қаласының әкімі Жандос Тасов ҰОС ардагері Бадан Төребай мен тыл ардагері Қалтай Алдиновтың шаңырағына барып, мерекемен құттықтады. Түркістан облысының әкімі Дархан Амангелдіұлының құттықтау хатын табыстады.

Өз кезегінде соғыс ардагері мен тыл еңбеккері, жас ұрпақтың бейбіт өмірде бақытты ғұмыр кешуін тілеп, қазақ елінің тәуелсіздігі мәңгі жасай берсін деп ақ баталарын тілегін арнады.

1924 жылы дүниеге келген Бадан Төребаев 1944 жылы 15 қазанда шақыртумен әскерге аттанып, 4 ай әскери дайындықтан өткен соң, Белоруссиядан бастап Берлинге дейінгі қан майдандарда шайқасқан.

Майдангер ауыр шайқаста көзге түсіп, «Ерлігі үшін» медалімен марапатталған. Сондай-ақ І-ші дәрежелі «Ұлы Отан Соғысы» орденімен, 2 рет «Ерлігі үшін», «Берлинді алғаны үшін», «Германияны жеңгені үшін» медальдарымен наградталған.

Елге 1950 жылы қарашада оралып, Кентау қаласындағы «Мырғалымсай» кенішінде ұзақ жылдар бойы қызмет атқарып, сол қызметі зейнетке жеткізді. Ол 2 ұл, 3 қызынан 14 немере, 31 шөбере, 2 шөпшек сүйген бақытты ардагер.

Ал, Қалтай Алдинов 7 мамыр 1941 жылы дүниеге келген. Жастайынан еңбек араласып өскен қария соғыс жылдар өмірдің тауқыметін көріп есейген. 1961 жылы “Ачполиметалл” комбинатының құрылыс жұмыстарында қызмететкен. Қазіргі таңда 6 ұл қыздан 20 немере, 18 шөбере, 1 шөпшек көріп отырған бақытты ардагер.