ТҮРКІСТАН: Сауранда ҰҚК-нің жаңа ғимараты ашылды

Сауранда жаңа ғимарат ашылды, деп хабарлайды ERNUR.KZ.

Түркістан облысы, Сауран ауданында Ұлттық қауіпсіздік комитетінің жаңа әкімшілік ғимараты пайдалануға берілді. Бұл нысанда қауіпсіздік қызметкерлеріне қолайлы жағдай жасалған. Нысанның ашылуына Түркістан облысының әкімі Н.Көшеров, ҚР ҰҚК Түркістан облысы бойынша департаментінің бастығы Б.Қалмұрзаев және сала ардагерлері қатысты.

– Мемлекет басшысының бастамасымен жүргізіліп жатқан реформалар аясында ұлттық қауіпсіздік жүйесін нығайтуға үлкен көңіл бөлінуде. Ел тыныштығы – ең қымбат құндылық. Ел мүддесін қорғау – әрбір азаматтың қасиетті парызы. Бұл – еліміздің қауіпсіздігін қамтамасыз етудегі маңызды қадам. Жаңадан қалыптастып келе жатқан Сауран ауданы құрылғалы бері ауқымды жұмыстар атқарылып келеді. Аймақтың дамуы жалғаса береді, – деді Нұралхан Көшеров.

Саудан ауданы 12 ауылдық округтен тұрады, онда жалпы саны 33 елді мекен бар. Аудан орталығы – Шорнақ елді мекені. Жалпы аумағы 646 мың гектардан асатын Сауран ауданында 103 мың адам тұрады.

Ауданның бас жоспарына сәйкес, аудан орталығынан 38 гектар жер бөлініп, әкімдік, прокуратура, Ұлттық қауіпсіздік комитеті, аумақтық органдар және ішкі істер басқармасы ғимараттары салынды.

Сонымен қатар облыстық Құрылыс басқармасы тарапынан өрт сөндіру депосы мен 500 орындық аудандық орталық аурухананың жобалық-сметалық құжаттары әзірленуде. 500 орындық мәдениет үйінің құрылысы жүріп жатыр.

Ауданның әкімшілік іскерлік орталығында спорт кешенінің құрылысы жүргізілуде. «Әлеуметтік қызмет көрсету орталығы» мен 300 орындық оқушылар сарайының құрылысына жоба-сметалық құжаттама әзірленуде.

Түркістанның облыс мәртебесін алуы мен Сауран ауданының қайта құрылуы өңірдің іскерлік әлеуетін арттырып, жаңа жобаларды жүзеге асыруға мүмкіндік берді. Мемлекеттік ғимараттар мен тұрғын үй құрылысы қарқынды жүргізілуде.

Сауран ауданының жаңа даму кезеңі басталғалы бері жүздеген шағын және орта кәсіпорындар ашылды. 30 гектар аумақта орналасқан «Шағын өнеркәсіптік парк» жобасы аясында 10 ғимарат пайдалануға беріліп, 8 жоба іске қосылды. Нәтижесінде мыңға жуық жаңа жұмыс орны ашылды. Сонымен қатар қосымша 29 жобаны іске асыру жоспарлануда.