Түркістанда байдарка мен каноэде есуден ел чемпионаты басталды

Түркістанда байдарка мен каноэде есуден ересектер арасында ел чемпионаты басталды, деп хабарлайды ERNUR.KZ.

Түркістан қаласында олимпиадалық стандартты ескек есу каналында байдарка мен каноэде есуден ересектер арасында Қазақстан Республикасының көктемгі чемпионаты басталды. Спорттық шараның ашылу салтанатында Түркістан облыстық дене шынықтыру және спорт басқармасының басшысы Ғалымжан Худияров, Оңтүстік Корея елінің азаматы, Азиялық байдарка және каноэ есу конфедерациясының Бас хатшысы Ким Джейк құттықтау сөз сөйлеп, жарысқа қатысушы спортшыларға сәттілік тіледі. Мәртебелі мейман Түркістандағы салынып жатқан олимпиадалық стандартты ескек есу каналына жоғары бағасын берді.

Айтулы додаға еліміздің 11 өңірінен ең мықты ескекшілер қатысып, шын мықтыны анықтауда. Елшілік додада Түркістан облысының спортшылары жоғары дайындықпен келгендерін көрсетуде. Тәжірибелі маман Денис Жәрменов жетекшілік ететін облыстық су спорт түрлерінен олимпиада резервінің мамандандырылған балалар-жасөспірімдер спорт мектебінің шәкірттері бұған дейін де бірнеше рет республикада топ бастады. Енді өз жерлерінде де жеңістің шыңын бағындыру үшін бар күш-жігерлерін салатын болады.

Жарыс қорытындысында үздік атанған спортшылар ұлттық құрамаға шақырту алып, Қытайдың Нанчанг қаласында 8-10 мамыр күндері өтетін Азия чемпионатында ел намысы үшін жарыс жолына шығады.

Ескекшілер арасындағы чемпионатты «Қайық» республикалық федерациясы, ҚР Дене шынықтыру және спорт істері комитетінің «Спортты дамыту дирекциясы», Түркістан облысы әкімдігі, Түркістан облысы мен Шымкент қаласының ескек есу және желкенді спорт қауымдастығы ұйымдастырды.