Түркістанда Бекзат Саттарханов туралы кітаптың тұсаукесері өтті

Түркістанда Бекзат Саттарханов туралы кітаптың тұсаукесері өтті, деп хабарлайды ERNUR.KZ.

Бүгін Оқушылар сарайында қазақ спорт тарихында алтын әріппен жазылған есім – Бекзат Саттархановтың қысқа, бірақ жарқын ғұмырына арналған «Жарқ етіп сөнген 20 жас» кітабының тұсаукесері өтті.

Жиынға танымал спортшылар, зиялы қауым өкілдері, БАҚ өкілдері мен қала мектептерінің оқушыдары қатысты. Іс-шараның басты мақсаты – Бекзаттың ерлігі мен спорттық жолын келер ұрпаққа үлгі ету, оның қайтпас қайсар мінезін, жеңіс жолын насихаттау.

Кітапты шығару туралы идеяны ұсынған Оқушылар сарайының директоры Индира Сарқытқызы: «Жас балалардың жігерін ояту үшін осындай кітаптар, кездесулер ұйымдастыру маңызды» дейді.

Одан кейін Бекзаттың анасы Сырлыгүл Шойбекова ханымға сөз беріліп, ол баласының бала кезінен спортқа деген сүйіспеншілігі мен табандылығы туралы естеліктерімен бөлісті. «Ұлдың табысты болуы – ең алдымен, ананың тәлімінің нәтижесі» деген ұлағатты сөзді негізге ала отырып, қатысушылар Бекзаттай батырды тәрбиелеген анасына алғыс білдірді.

Кітаптың авторы Ержан Арғынбаев мырза сөз алып, туындының жазылу тарихымен таныстырып, Бекзаттың жеңісті жолы, рухани болмысы мен армандары туралы баяндады. Оның айтуынша, бұл кітап – тек спортшының өмірбаяны емес, жасампаздық пен қайсарлықтың символына айналған рухани еңбек.

Кездесу барысында қатысушылар Бекзаттың мұрасын сақтау мен дәріптеу жайлы ой-пікірлерін ортаға салып, көкейдегі сұрақтарын қойды.

Шараның ең әсерлі сәті – «Жарқ етіп сөнген 20 жас» кітабының тұсаукесер рәсімі болды. Жиын соңында қатысушылар бұл еңбектің жас буынға мотивация беріп, жаңа белестерді бағындыруға жігер сыйлайтынына сенім білдірді.