Бұл додада ел намысын қазақ күресінің таңдаулы шеберлері қорғайды.
Түркістан төріндегі «Olympic Center» спорт кешенінде ересектер арасында төл спортымыз – қазақ күресінен Азия чемпионаты өтуде, деп хабарлайды ERNUR.KZ.
Түркі дүниесінің рухани ордасына айналған қасиетті Түркістан қаласында ұйымдастырылып отырған сарықұрлық біріншілігінде ерлер мен әйелдер 16 салмақ дәрежесі бойынша боз кілемге шығып, өзара мықтыны анықтайды.
Байрақты бәсекенің салтанатты ашылу рәсімінде Түркістан облысы әкімінің орынбасары Ертай Алтаев жарысқа қатысушыларды құттықтап, сәттілік тіледі.
– Түркі әлемінің рухани астанасы – Түркістанда ересектер арасындағы қазақ күресінен Азия чемпионаты басталды. Биыл Мемлекет басшысының тапсырмасымен Түркістанның ерекше мәртебесі туралы Заң қабылданды. Соның нәтижесінде өңірді жан-жақты дамыту жұмыстары күшейді. Әсіресе спорт саласына ерекше көңіл бөлініп, жаңа нысандар бой көтерді. Қалада халықаралық жарыстар жиі өтуде. Бүгінгі чемпионат – соның жарқын көрінісі. Қазақ күресі – халқымыздың ұлттық рухы мен батырлық болмысының айнасы. Бүгін Азияның ең мықты балуандары осы киелі топырақта бас қосып, өз өнерін көрсетуде, – деді Ертай Кенжебекұлы.
Сондай-ақ, Qazaq Kuresi Ассоциациясының бас директоры Дамир Бекбосынов пен UWW ұйымының бас төрешісі Эдмар Абдулаев құттықтау сөз сөйлеп, спортшыларға жеңіс пен сәттілік тіледі.
Биылғы құрлықтық чемпионатқа Азияның 12 мемлекетінен – Қырғызстан, Тәжікстан, Өзбекстан, Түркіменстан, Үндістан, Жапония, Иран, Моңғолия, Пәкістан, Непал, Филиппин, Бангладеш және Қазақстаннан 150-ге жуық балуан қатысуда.
Бұл додада ел намысын қазақ күресінің таңдаулы шеберлері қорғайды. Қазақстан ұлттық құрамасының сапында 16 балуан (8 ер, 8 әйел) сынға түседі.
Ерлер құрамасы:
55 кг – Архат Баймұрзин
60 кг – Нұртілек Қаракесеков
66 кг – Нұрғали Тұрсынғазиев
74 кг – Тілек Тоқтасынұлы
82 кг – Асылжан Кәрім
90 кг – Айдар Бескемпір
100 кг – Ерқанат Молдағұлов
+100 кг – Қайсар Шамшидинов
Әйелдер құрамасы:
48 кг – Айдана Хасенқызы
52 кг – Сағат Байғараева
56 кг – Ақнұр Асылбекова
60 кг – Назерке Асанхан
65 кг – Ұлдана Таңжарықова
70 кг – Ақбота Қыдырәлі
77 кг – Аружан Жандарбай
Айта кетейік, бұл қазақ күресінен өтіп жатқан Азия чемпионатын Qazaq Kuresi Ассоциациясы, Түркістан облысының әкімдігі, облыстық дене шынықтыру және спорт басқармасы жоғары дәрежеде ұйымдастырды.
