Франция мен Италияда қатты желден ондаған адам көз жұмды

ERNUR.KZ. Франция мен Италияда қатты найзағай мен дауыл соғып, кем дегенде сегіз адам қаза тапты, деп жазады baq.kz.

Meteo France ұлттық метеорологиялық агенттігінің хабарлауынша, дауыл салдарынан кейбір аудандарда желдің екпіні 220 км/сағ болды.

Француз билігінің мәліметінше, Корсика аралында алты адам көз жұмды, ондаған тұрғын жарақат алып, 12 адам ауруханаға жатқызылды, олардың біреуі ауыр халде. 45 мыңға жуық үй электр жарығынсыз қалған.

Сәрсенбі күні Париж метро станциялары мен Марсельдің ескі портын су басқан. Сейсенбіде су тасқыны кезінде Эйфель мұнарасының жоғарғы жағында 100 км/сағ жылдамдықпен жел соққан.

Жерорта теңізінің француз теңіз басқармасының мәліметі бойынша, апатқа ұшырап, суға батып кеткен 100-ден астам қайық шұғыл көмекке жүгінген.

Италияның Тоскана және Венето аудандарында төтенше жағдай жарияланды.

Бейсенбіде дауылдан Лукка мен Каррара қалаларының маңындағы ағаштар құлаған кезде Тосканада екі адам көз жұмған. Каррара маңындағы шатырлы лагерьде ағаштардың құлауынан тағы төрт адам жарақат алды.

Венецияда қатты жел Әулие Марктың қоңырау мұнарасының кірпіш бөліктерін жұлып әкетті, туристер ғимараттан эвакуацияланды.

Италияның солтүстігінде дауыл салдарынан Генуя қаласынан оңтүстік-шығысқа қарай жүретін теміржол желісін жабуға тура келген. Қатты жел электр тізбегін зақымдаған.