Трамп Путинмен қолайлы уақытта кездесуді жоспарлап отырғанын мәлімдеді

0
263

АҚШ президенті Вашингтонның мақсаты Украинадағы қақтығысты тоқтату екенін баса айтты.


Трамп Путинмен қолайлы уақытта кездесуді жоспарлап отырғанын мәлімдеді

фото: Alex Brandon

ERNUR.KZ. АҚШ президенті Дональд Трамп Ресей басшысы Владимир Путинмен "қолайлы уақытта" кездесуді жоспарлап отыр. Бұл туралы Трамп Луизианаға сапары кезінде ұшақ бортындағы журналистерге айтты, деп жазады sputnik.kz.
"Мен Путинмен қолайлы сәтте кездескім келеді. Дұрыс уақытта", - деді Трамп.
Сонымен бірге ол Ресей басшысымен байланысы туралы егжей-тегжейлі мәлімет беруден бас тартып: "Мен бұл жайында сөйлескім келмейді" деп қысқа қайырды.
АҚШ президенті Вашингтонның мақсаты Украинадағы қақтығысты тоқтату екенін баса айтты.
"Біз Украинадағы қақтығысты тоқтатқымыз келеді, өйткені қыршын кетіп жатқан жастардың өліміне қарап отыра алмаймын", - деп толықтырды ол.
Путинмен инаугурация алдында немесе одан кейін келіссөз жүргіздіңіз бе деген сұраққа Трамп мұндай байланыс болғанын растады, бірақ егжей-тегжейлі жауап беруден бас тартты.
"Тағы да сөйлесеміз деп ойлаймын. Біз бұл соғысты тоқтатуымыз керек", - деп түйіндеді ол.
Бұған дейін РФ президентінің баспасөз хатшысы Дмитрий Песков Ресей келіссөздерге дайын екенін мәлімдеді. Оның айтуынша Украинадағы қақтығыс келіссөздер деңгейінде шешілуге тиіс. Бұл бағытта әлі нақты қадам жасалған жоқ.