СӘН мен СЫМБАТ күтімінде көмектесетін теңдессіз СОҢҒЫ технологиялар

28.12.2024 20:52

541

Ақылды айна бетіңіздің күтіміне қатысты кеңес береді. Ал ақылды алқа зиянды және артық тамақтанудан сақтайды.

«Ақылды айна F770»

Бір кездері арман-қиялға ғана сыйған ойлар күн өткен сайын шындыққа айналып барады. Солардың бірі – ертегідегі ханшайымның ақылды айнасы. Енді сіз ХХІ ғасырдың жаңа ақылды айнасымен өзіңіздің сымбатыңыз жайлы сыр шертіп, келбет күтіміне қатысты кеңес ала аласыз.

Ресейлік премиум бренд Bork ерекше гаджет жасап шығарды. Бұл – «Ақылды айна F770» деп аталатын шағын құрылғы. Ол теріңіздің саулығы мен ылғалдануын бағалап, SPF-кремді дұрыс жағып-жақпағаныңызды тексеруге көмектеседі.

Айна қалай жұмыс істейді?

Жоғарғы бөлігі – реттелетін жарығы бар айна (салқын, жылы, бейтарап жарық түрлері).

Төменгі бөлігі – 1,6 дюймдік сенсорлы экран, онда күн сәулесінің деңгейі мен ауа ылғалдылығы туралы ақпарат көрсетіледі.

Ультракүлгін камера – SPF-кремді қалай жаққаныңызды талдайды.

Үш камера – тері ылғалдылығы мен саулығын бағалайды.

Құрылғының артықшылықтары:

Бірнеше күнге дейін қуатын сақтайды.

USB-C арқылы зарядталады.

IPX3 стандарты бойынша судан қорғалған, мысалы, жаңбырдан зақымдалмайды.

Жиналмалы девайс өте жеңіл, бар болғаны 134 грамм.

Көлемі – 8 см, ені – 1 см, сөмкеге де, қалтаға да сыйымды.

Бұл айна тері күтіміне арналған көмекші құрал ретінде жаңа деңгейге көтереді. Енді өзіңіздің сыртқы келбетіңізді талдап, керемет нәтижелерге қол жеткізе аласыз!

Drop алқасы

Rex.fit стартапы дұрыс тамақтану ережелерін ұстануды жеңілдететін ерекше құрылғыны таныстырды. Енді теңестірілген, дұрыс тамақтану режимін ұстану үшін әр астың грамы мен калориясын санап бас қатырмайсыз. Drop – жасанды интеллект көмегімен алдыңыздағы тағамды автоматты түрде анықтап, оның құрамын және калориясын есептейді.

Құрылғы қалай жұмыс істейді?

Drop – 4K камерасы бар шағын кулон. Камера тағамды түсіріп, оның түрі мен құрамын (ақуыз, көмірсу, май, зиянды қоспалар, т.б.) анықтайды, калориясын есептейді. Сосын барлық мәліметті смартфондағы арнайы қосымшаға жібереді. Мәліметтер құпиялы түрде өңделіп, суреттер бірден өшіріледі.

Кімдерге пайдалы?

Drop арықтағысы келетіндерге, спортпен айналысатындарға немесе дұрыс тамақтанғысы келетіндерге таптырмас көмекші бола алады. Сонымен қатар, қосымшада дұрыс дайындалған тағам рецептері, жаттығу жоспарлары мен пайдалы кеңестер беріледі.