Әскерде ауыр жарақат алған Ербаян Мұхтардың ісінде әлі күдіктілер жоқ

Фото: Видео кадрларынан

ERNUR.KZ. Бас әскери прокурордың бірінші орынбасары Мақсат Қазиев борышын өтеу кезінде басынан ауыр жарақат алған сарбаз Ербаян Мұхтардың ісі бойынша күдіктілерді әлі де жоқ екенін айтты, деп жазады stan.kz.

Мақсат Қазиев іс бойынша тергеу әлі де жалғасып жатқанын жеткізді.

"Жедел-тергеу іс-шараларының кешені жүргізілуде. Бүгінде қылмыстық кодекстің 201-бабына сәйкес тергеу нәтижелеріне түсініктеме бере алмаймыз. Өйткені ол көптеген адамдардың мүдделерін қозғайды. Тергеу Бас прокуратураның, Бас әскери прокурордың ерекше бақылауымен жүзеге асырылады. Ал Ұлттық ұлан сарбаздың ата-анасымен байланыста", – деді ол.

Қазиев сондай-ақ, қазіргі уақытта іс бойынша нақты күдіктілер жоқ екенін алға тартты. Айтуынша жағдайда тек бірнеше адамдар шеңбері бар және олар туралы әлі де пысықталуда.

Еске салсақ, бұған дейін Алматы облысында әскери бөлімде жарақат алып, алты ай бойы комада жатқан сарбаздың анасы әділдік талап еткені туралы жазған едік. Анасының айтуынша, сарбазға әскери бөлімде қысым көрсетілген. Кейін тіпті ата-анасының рұқсатынсыз дәрігерлер оған ота жасап, миының жарты бөлігін алып тастаған. Қазақстандықтар 6 айдан астам комада жатқан сарбаз Ербаян Мұхтардың емі үшін 230 миллион теңге жинап берді. Қазір Ербаян Түркиядан ем алып келді.