Барлық облыс «жасыл» аймаққа енсе, студенттер офлайн білім алуы мүмкін

ERNUR.KZ. ДСМ-нің болжамдарының пессимистік сценарий бойынша, наурыз айында КВИ сырқаттанушылық деңгейі артуы мүмкін болған. Бірақ бұл болжам болған жоқ. Енді балалар мектепке орала ма? Орталық коммуникациялар қызметі алаңында өткен брифингте ҚР ДСМ медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК сарапшысы Нұршай Әзімбаева тілшілердің осындай сұрағына жауап берді, деп жазады azattyq-ruhy.kz.

«Бүгінде вирус жұқтырғандар саны азайып отыр. Эпидемиологиялық ахуал тұрақтанып келеді. Осыған орай бұл мәселе қайта қаралады. Наурыз айындағы эпидемиологиялық жағдайға, сырқаттанушылық деңгейінің өсіп-өршуіне байланысты басқа шаралар қабылдануы мүмкін», - деді Н. Әзімбаева.

Ресми мәліметтерге сәйкес, 2020 жылғы 1 қыркүйектен осы күнге дейін офлайн түрде оқитын оқушылар арасында коронавирус жұқтырған 2583 жағдай, онлайн оқитын балалар арасында 6089 жағдай тіркелген. Спикердің айтуынша, еліміздің барлық өңірі «жасыл» аймақта болған жағдайда, студенттер офлайн білім алуға ауысуы мүмкін.