Энергетика министрлігінің өкілі көмір генерациясы бойынша ұлттық жобан іске асыру туралы айтты

0
102

Энергетика министрлігі саланы 2035 жылға дейін дамыту және жаңғырту жоспарын ұсынды.


Энергетика министрлігінің өкілі көмір генерациясы бойынша ұлттық жобан іске асыру туралы айтты
ERNUR.KZ. Атап айтқанда, 2035 жылға дейін 26 ГВт қуатты енгізу жоспарланып отыр. Оның ішінде 8 ГВт-тан астамы – жаңартылатын энергетикаға, 10 ГВт-тан астамы – жаңа станциялар салуға, соның ішінде атом станциясына тиесілі. Бұл бағыттағы жұмыс Атом энергиясы агенттігімен бірге жүргізілуде. 5 ГВт-тан астамы қолданыстағы станцияларды жаңғырту мен кеңейтуге қарастырылған. Бұл туралы ҚР энергетика вице-министрі Сұңғат Есімханов ОКҚ алаңында өткен баспасөз мәслихатында мәлімдеді.

Спикердің айтуынша, ағымдағы жылдың екінші тоқсанында Қызылорда БГҚ-сын (бу-газ қондырғысы) іске қосу күтілуде. Қазір іске қосу-баптау жұмыстары жүріп жатыр, алғашқы 20–30 МВт берілуде, екінші тоқсанда станция толық жұмыс істейді.

«Сондай-ақ Түркістандағы және Алматы станцияларындағы БГҚ жобалары бақылауда. Мемлекет басшысы оларды жыл соңына дейін аяқтауды тапсырды. «Самұрық-Қазына» қорымен бірлесіп осы жобаларға тұрақты мониторинг жүргізілуде. Көмір генерациясы жөніндегі ұлттық жобаға жеке тоқталғым келеді. Біз қазірдің өзінде іске асыру кезеңіне белсенді түрде кірдік. Нарықтың барлық қатысушысымен дөңгелек үстел өткізілді, онда негізгі бағыттар талқыланды. Бастапқыда жоба көмір генерациясын дамыту ретінде қарастырылды, алайда Тау-кен өндіру және көмір секторы қауымдастығының белсенді қатысуын ескере отырып, міндеттер кеңейтілді. Негізгі бағыттар: жоғары тиімді көмір генерациясын дамыту, қолданыстағы көздерді жаңғырту, көмір базасын кеңейту, экологиялық факторды міндетті түрде ескеру, сондай-ақ қаржыландыру мәселелері. Әлемдік үрдісте көмір жобаларын қаржыландыруды шектеу жағдайында бұл мәселелер ерекше назарды талап етеді», – деп атап өтті вице-министр.

Ірі жобаларды іске асыру тетіктері айқындалды. ГРЭС-3 және Курчатов бойынша тендерлер өткізілді. Жаңа жобалар да қарастырылуда. Атап айтқанда, Шахтинскіде тозығы жеткен станция бар, онда заманауи көмір технологияларын енгізу мүмкіндігі бар. Көмірмен қамтамасыз ету мәселесіне келсек, тек жаңа жобалардың өзіне қосымша шамамен 16 млн тонна көмір қажет болады.

«Келесі мәселе – көмірді тасымалдау. Көлік министрлігі және «ҚТЖ»-мен бірлесіп теміржол инфрақұрылымын кеңейту тетіктерін және тарифтер ауқымын айқындау қажет, өйткені бұл көмір генерациясының тарифтеріне тікелей әсер етеді. Сондай-ақ қаржыландыру және кепілдіктер беру мәселелері маңызды. Бұл да ескерілуде. Кадр саясатына жеке назар аударылады. Негізгі фактор – жалақы деңгейі, өйткені білікті мамандарды тартуға бәсекеге қабілетті еңбекақы ғана мүмкіндік береді. Жаңартылатын энергетика бойынша жоспарлар айқындалған. 2030 жылға қарай 15% индикаторы белгіленді. Өткен жылдың қорытындысы бойынша 7%-дан астам көрсеткішке қол жеткізілді. Әрбір жоба, іске асыру мерзімдері және қолдау тетіктері бойынша нақты түсінік бар. Бұл бағыттағы жұмыс жалғасады», – деп қосты спикер.