Қазақстан терроризмді қаржыландыруға қарсы шараларды күшейтті

Бүгін қылмыстық кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топ туралы келісімге өзгерістер хаттамасы ратификацияланды.

"Құжат жаппай қырып-жою қаруын тарату үшін берілетін қаржыны тоқтату жөніндегі шаралармен толықтырыла отырып, ЕАТ өкілеттіктерін кеңейтеді. Сондай-ақ негізгі анықтамалар нақтыланады, ұйымның жұмысы және оның бюджетін қалыптастыру тәртібі реттеледі", - деп түсіндірілді сенатта.

Қабылданған өзгерістер қаржы ағындарын бақылауды күшейтуге, халықаралық ынтымақтастықтың тиімділігін арттыруға және Қазақстанның ФАТФ (Financial Action Task Force – ақшаны жылыстатуға қарсы күрестің қаржылық шараларын әзірлеу тобы) стандарттарына сәйкестігін қамтамасыз етуге мүмкіндік береді.

Сондай-ақ сенатта Базель басқару институтының ақшаны жылыстатуға қарсы іс-қимыл индексінде Қазақстан былтырғы жылдың қорытындысы бойынша өз позициясын жақсартып, 4,65 балл (10-ең жоғары тәуекел) алғанын хабарлады.

Нәтижесінде ол АҚШ, Жапония, Сингапур, Қытай, Катар, Италия, Венгрия және Түркиядан озды.