“Қорғандым“: төбелес кезінде адам өлгені үшін сотталған қазақстандық босап шықты

Кейін жігіттер арасында төбелес басталып, екеуі жерге құлайды. Айыпталушы шабуылдаушыны ұрып, қолын ұстап тұрған. Оларды сол жердегі адамдар ажыратқанымен, шабуыл жасаған жігіт қайтадан пышағын алып, оны түсіріп алады. Артынша өзі құлап, сол жерде жан тапсырған.

Сот-медициналық сараптама оның өліміне ауыр бас сүйек-ми жарақаты мен миға қан кетуі себеп болғанын анықтады.

Былтыр сот айыпталушыны қасақана ауыр дене жарақатын келтіріп, абайсызда адам өліміне әкелді деген айыппен 4,5 жылға бас бостандығынан айырған. Алайда марқұмның анасы бұл жазаны тым жеңіл деп есептеп, оны күшейтуді талап етті. Прокуратура оны қолдап, жазаны 8 жылға ұзартуды сұрады. Ал қорғаушы тарап жігіттің тек өзін қорғағанын айтып, толықтай ақтауды талап етті.

Апелляциялық сот видеожазбаларды қайта қарап, медициналық сарапшының пікірін тыңдап, істі қайта саралады.

"Ең төменгі қауіпсіздік мекемесінде бір жылға бас бостандығынан айыру түріндегі жаза тағайындалсын. Жаза мерзімінде есептелген қамауда ұстау уақытын ескере отырып, екі күн үшін бір күн есебінен Қ. жазасын өтеген болып есептелсін және дереу қамаудан босатылсын",-деп Павлодар облыстық сотының қылмыстық істер жөніндегі сот алқасының төрағасы Мұрат Солтыбаев сот қаулысын жариялады.

Соттан кейін жігіт мұндай шешімді күтпегенін мойындады.

"Ешкім кепілдік бере алмайды, бір күні клубқа барып, осындай жағдайға тап болмайтынына. Мұндай кезде біреу қашады, біреу қорғанады. Маған 8 жыл берілуі мүмкін екенін естігенде, бәрі біткен шығар деп ойладым. Бірақ әділдікке сендім", – деді ол.