Маңғыстау ауданында «Ауыл аманаты» жобасы тиімді жүзеге асырылуда

08.11.2024 17:28

Жобаның алғашқы кезеңінде аудан көлемінде 12 ауылдың тұрғындарына саралау жұмыстары жүргізілді. Нәтижесінде 193 әлеуметтік көмек алушы мен 1611 жұмыссыз тұрғын анықталды.

Биыл «Ауыл аманаты» жобасы мал шаруашылығы мен өзге бизнес түрлерін дамытуға басымдық берді. Мал шаруашылығына 24 жоба қаржыландырылып, өзге бизнес түрлеріне 30 жобаға қолдау көрсетілуде. Бұл жобалар іске асқанда аудан бойынша жұмыссыздықты төмендетіп, қосымша 50 жұмыс орнын ашуға ықпал етпек, деп хабарлайды ERNUR.KZ Маңғыстау облысының әкімдігіне сілтеме жасап.

2023 жылы аудан тұрғындарының табысын арттыру мақсатында 23 жобаға несие бөлінді. Оның ішінде 19 жоба мал шаруашылығына, 4 жоба өсімдік шаруашылығына берілді. Мал шаруашылығы жобасы аясында 342 бас мал сатып алынып, Жыңғылды ауылында бақша өнімдерін өсірумен айналысатын кооператив құрылды.

«Каспий» ӘКК арқылы несие алған Шетпе ауылы 12, Жыңғылды 6, Шайыр, Онды, Ақтөбе, Жармыш және Тұщықұдық ауылдық округтері 1 жобадан іске асырды.

Сонымен қатар, «Ауыл аманаты» жобасы аясында түйе сүтін арттыруға 10 жоба ұсынылды. Маңғыстау ауданы облыстағы түйе басының 40%-ын қамтитын болғандықтан, кәсіпкерлерге қосымша жеңілдіктер қарастырылып отыр. Жылына 20 мың тонна сүт өндірілетіндіктен өнімді ірі сүт зауыттарына жеткізу жоспарлануда.

Ал ет өндірісін дамытуға 12 жоба және тауық етін өндіруге 2 жоба қарастырылған. Өндірілген өнімдерді Ақтау қаласындағы көтерме сауда орталығына тарату үшін барлық қажетті қолдау көрсетіледі.

«Ауыл аманаты» жобасы аудан көлемінде жұмыссыздықты төмендетуге, шағын кәсіпкерлікті дамытуға және аудан экономикасын нығайтуға бағытталған.