​Павлодар облысында жер үй өртеніп, бір адам қаза тапты

— 23 ақпан күні сағат 11.28-де Железин ауданының Михайловка ауылында жеке меншік тұрғын үйде тұрмыстық газ баллонды қауіпсіз пайдалану талаптарын бұзу нәтижесінде газ-ауа қоспасы тұтанды. Салдарынан 70 шаршы метр алаңды өрт шарпыды.

Өрт орнына жедел түрде 16-ӨСБ өрт сөндірушілері жіберілді. Сонымен қатар Михайловка ауылының жергілікті атқарушы органдарының өрт сөндіру бекеті жұмыс істеді. Жергілікті атқарушы органдардың өрт сөндіру бекетінің күшімен үй ішінен 1959 жылы туған үй иесінің мүрдесі табылды. Сағат 14.00-де өрт толықтай сөндірілді, - деп хабарлады Павлодар облысы төтенше жағдайлар департаменті.

ТЖД күштері мен құралдарынан 3 қызметкер және 2 техника, сондай-ақ жергілікті атқарушы органдардың 4 адамы мен 1 техника жұмылдырылған.

Өрттен қаза тапқан марқұмның екінші топтағы мүгедек екені анықталды.