Таиландта туристер мінген қайық бір емес, екі рет жарылған: Қазақстан азаматтары қорқынышты кадрларды көрсетті (ВИДЕО)

ERNUR.KZ. Күні кеше Таиландтың Пхукет аралында туристер мінген қайық жарылып, өртеніп кеткен еді. Тур арқылы осы қайықпен аралдарды аралап жүрген Қазақстан азаматтары Думан Байкен мен Бақытгүл Байкен оқиға орнынан бірнеше видео жүктеген, деп жазады azattyq-ruhy.kz.

Думан Байкеннің айтуынша, туристердің жеке заттары өртеніп, біраз адамды күйік шалған. Соның ішінде Думанның қолына да от тиіп, қолтығы жараланған екен. Кешегі видеосында Думан мен әйелі құжаты өртенгенін айтып, қазақстандықтардан көмек сұраған еді.

«Аралға баратын тур алдық, алайда, міне осындай қауіпті жағдай орын алды. Бір өкініштісі, құжаттарымыз жанып кетті. Одан өзге менің телефоным мен өзге де заттарымыз өртеніп кетті. Мәселеден сырт айналып кетпейтін азаматтардан көмек сұраймын. Мұндай жағдайда не істеуге болады?», - деген еді Думан кешегі видеосында.

Ал бүгін, бірнеше сағат бұрын оның жұбайы Бақытгүл Байкен консул хабарласып, мәселе шешіліп жатқанын айтты.

«Бізге хат жазып, алаңдап жатқан баршаңызға рақмет. Консул хабарласты, біз елге кететін уақытқа дейін уақытша құжат жасап беремін деді. Ал, біздің жағдайымызға алаңдап, көмек ретінде ақша жинайық деп жатқан азаматтарға көп рақмет, бірақ бізге ақша керек емес. Ақша жағынан қиналып тұрған жоқпыз. Ата-анамыз, туғандарымыз аман болсын», - дейді Бақытгүл Байкен.

Ол әлеуметтік желісіне сол күнгі апат қалай және нешеде болғанын көрсетіп, қайық бір емес, екі рет жарылғанын жазды.