​Той өтіп жатқан мейрамханада өрт шықты (видео)

Қостанайда "Астам" мейрамханасы той өтіп жатқан кезде өртенді, деп хабарлайды ERNUR.KZ sputniknews.kz сайтына сілтеме жасап.

Мейрамханадағы өртті оқиға куәгерлері видеоға түсіріп алған. Кадрлардан ғимараттың шатыры лаулап жанып жатқанын, ал адамдардың далада қарап тұрғанын көруге болады.

"Бүгін той, барлығы "Астамнан" далаға жүгіріп шықты, даяшылардың бәрі қашып кетті", - дейді видео авторы.

Төтенше жағдайлар комитетінің ресми өкілі Руслан Иманқұлов оқиғаның мән-жайын айтып берді.

"Астам" мейрамханасының шатырында өрт шыққаны туралы хабарлама сағат 17.30-да түскен. Он минуттан кейін оқиға орнына өрт сөндірушілер жетті.

"Өртенген аумақтың жалпы көлемі – 1200 шаршы метр. Оқиға орнында 40 өрт сөндіруші мен 9 техника жұмыс істеді. 400 шаршы метр жерде төбе опырылып құлады", - деді Иманқұлов.

Алдын ала жасалған қорытынды бойынша, өрттің шығуына шатырда жүргізілген электр дәнекерлеу жұмыстары себеп болған.

Иманқұлов өрт шыққан уақытта ғимараттың ішінде көп адам болғанын растады.

"Мейрамханада банкет болып жатқан. 70-ке жуық адам сыртқа шығарылды. Зардап шеккендер жоқ", - деді ол.

Сағат 18.35-те өрттің жайылуы тоқтатылды.