Қазақ жерінде де пирамидалар болған

фото: itd0.mycdn.me

«Пирамида» десе, бірден есімізге бас қаламыздағы заманауи үлгіде салынған бас ғимараттардың бірі түседі. Ал, сіз «Қазақ жерінде ерте ғасырларда пирамидалар салынған» дегенге сенер ме едіңіз?

Расында, Бейбітшілік және келісім сарайының бүгінгі мақалаға еш қатысы жоқ. Әңгіме оның «ата-бабасы» — ерте дәуірлердегі тастан тұрғызылған үштағанды мұнаралар жайлы. National Geographic Қазақстан ұйымы nationalgeographic.kz сайтында қазақ жерінен дәл осындай тас құрылыстың табылғанын және оны қалпына келтіру, зерттеу жұмыстарының жүріп жатқанын жариялады.

«Астанадан небәрі 340 шақырым жерде кейінгі қола дәуіріне тән пирамида табылды. Пирамида жайлы алғаш 2014 жылы белгілі болғанымен, оны қалпына келтіру жұмыстары 2017 жылы аяқталды. Кешен ішінен шыққан пышақ, ине, сақина, ыдыс бөлшектері, керамика секілді көптеген заттар Қарағанды қаласындағы өлкетану музейіне қойылған.

Пирамиданы тапқан Е.Букетов атындағы Қарағанды мемлекеттік университетінің археологы Игорь Кукушкиннің айтуынша, «бұл жерде ірі мемлекет қайраткері немесе ру көсемі жерленген болуы мүмкін. Ол шамамен 3000 жыл бұрын салынған».

Кешеннің айналасында көлемі шағын тағы бірнеше қорым бар. Ең қызығы ғимарат формасы Солтүстік Америка үндістерінің пирамдаларына өте ұқсас. Қазақстан мен Орталық Азия аймағында пішіні дәл осындай пирамида бұрын кездеспеген.

Ғылыми ортада бұған дейін қалыптасқан пікір бойынша Беғазы-Дандыбай мәдениетінің ірі ескерткіштері (Беғазы, Айбаз-дарасы, Бұғылы, Сандыру ескерткіштері) түгел ашылды деп саналатын. Ал бұл жаңалық сол пікірді теріске шығармаса да, аталған дәуірге тән ірі кешендердің әлі де табылуы мүмкін екенін көрсетеді.

Пирамида Қарағанды облысы Шет ауданы Талды ауылының маңындағы Қаражартас деген жерде Талды өзенінің жағасында тұр.»

Бүгінгі Қазақстан туризмі қарыштап дамуға сеп таппай, алға келте адыммен басуда. Тіпті, кей тұстары бір орында тұралап тұр. «Аталған нысан дәл осы саланың қарқынды дамуына үлесін қосса, әлем саяхатшылары елімізді «Екінші Мысыр» атап, ағылып кеп жатар күн туса» деген арманға еріксіз жол бересің. Тым болмағанда, Астана қонақтары ондағы сәулетті ғимараттарды ғана емес, тарихи жәдігерді де тамашалауға асығатыны сөзсіз.

Дайындаған: А.Бектұрғанова

ERNUR.KZ