ШЫМКЕНТ: «DariKz» электрондық қосымшасы арқылы дәрі-дәрмектің шекті бағасын білуге болады

28.04.2022 08:11

419

ҚР аумағында рұқсат етілген дәрілік препараттар туралы барлық ақпаратты білуге болады.

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің Шымкент қаласы бойынша департаменті басшысының орынбасары Л.Қашқымбаева мен департаменттің медициналық қызметті жоспардан тыс бақылау бөлімінің басшысы Р.Сәбитова қаладағы медициналық қызметтер (көмек) көрсету саласындағы мемлекеттік бақылау туралы баспасөз брифингін берді, деп хабарлайды ERNUR.KZ.

«2021 жылы Департаментке 300 өтініш келіп түссе, оның 226 өтініші қаралған. Келіп түскен өтініштер негізінде 94 тексеру жүргізіліп, құзіреттілігі шеңберінде қарау үшін 47 өтініш тиісті мекемелерге жолданды. Сонымен қатар, мамандар 74 өтінішті қараудан бас тартса, 6 өтінішті иесі кері кері қайтарған. 2021 жылы шағымдардың ең көп саны медициналық-санитариялық алғашқы көмек пен стационар деңгейінде мемлекеттік медициналық ұйымдардың қызметіне жазылған. 2021 жылы Шымкент қаласының 31 жекеменшік медициналық ұйымдарында жеке және заңды тұлғалардың өтініші бойынша 18, мемлекеттік органдардың хаты негізінде 18 тексеру жүргізіліп, нәтижелері бойынша 11 өтініш негізді, ішінара негізделген 23 жағдай және негізсіз 2 шағым анықталды», - деді Л.Қашқымбаева.

Сондай-ақ, 2022 жылғы 1 тоқсанда өтініштер мен хаттардың ең көп саны МСАК деңгейі мен стационар деңгейіне тиесілі болып отыр. Аталған мерзімде барлығы 16 өтініш түсіп, оның ішінде негізделген 1, ішінара негізделген 11, негізсіз 2 шағым тіркелген.

Сонымен қатар, биылғы жылы Шымкент қаласының үш жеке меншік медициналық ұйымында тексеру жүргізіліп, нәтижесінде ішінара негізделген 2 жағдай, негізсіз 1 жағдай анықталған.

Өтініштің мазмұны бойынша басым көп жағдайда сапасыз тексерілуге және емделуге, еңбекке уақытша жарамсыздық туралы парақты берудің негізділігіне, емдеуге жатқызудан бас тартуға, науқастарды қабылдауды ұйымдастырудағы кемшіліктерге және өзге де себептерге шағымдар болды.

Сонымен қатар, ҚР-да «DariKz» электрондық қосымшасы жұмыс істейді. Аталған қосымшаны смартфонға жүктеп алып, халық ҚР аумағында рұқсат етілген дәрілік препараттар туралы барлық ақпаратты, оның ішінде олардың бағасын білуге болады.