Шымкентте «Балалар фольклоры – тәрбие негізі» атты іс-шара өтті

0
991

Үлес қосқан мектептерге арнайы алғыс хат пен сый-сияпат табысталды.


Шымкентте «Балалар фольклоры – тәрбие негізі» атты іс-шара өтті
Бүгін Шымкент қаласындағы Әдет-ғұрып және салт-дәстүр орталығында Тәуелсіздігіміздің 30 жылдығы қарсаңында «Балалар фольклоры – тәрбие негізі» атты іс-шара өтті, деп хабарлайды ERNUR.KZ.
«Рухани жаңғыру» бағдарламасының «Дәстүр мен ғұрып» арнайы жобасы аясында өткен тәрбие сағаты отбасы тәрбиесіндегі ұлттық құндылықтың негізгі өзегі баланың санасын ояту, бала – бақша және мектеп оқушыларына ұлттық құндылықтарымызды дәріптеу мақсатында ұйымдастырылды.
Танымдық кешке қаладағы №58, №50, №83, №15, №38, №135 жалпы орта мектеп оқушылары қатысты. Іс-шара барысында балалар сәбилік салт-жырлары қуырмаш, санамақ, тұсау кесу, тәй – тәй, тәмсілдер, нақыл, өсиет және қанатты сөздер, мақал – мәтел, жұмбақ, жаңылытпаштар айтып жарысты.
Ұйымдастырушы, дәстүр танушылар бұл ойындар балалардың абстаркциялық ойлау жүйесін байыту, сонымен қоса түсті жақсы ажыратуды меңгерту, бояулар үндестігін, құрақша құрастыру, ағаш конструкцияны түсіне қарап құрастыру, талғамын ерте қалыптастыруда маңызы зор деп есептейді.

Ұлтымыздың ұлттық құндылықтарын, өмір салтымызды заманға сай одан әрі насихаттау, байыту, оны бүгінгі жастардың санасына қалыптастыру қажет. Орталық директорының міндетін атқарушы Райхан Сапарқызы игі шараның маңыздылығына тоқталып, үлес қосқан мектептерге арнайы алғыс хат пен сый-сияпат табыстады.