Алматының арық жүйесі бірыңғай операторға беріледі

Зерттеулер көрсеткендей, жауын-шашын көп болып, қар еріген кезде Алматының нөсер арналарына кететін судың мөлшері 10%-тен аспайды.

Қалған су қаланың жоғарғы жағынан төмен қарай ағады. Абай даңғылынан төмен орналасқан көшелер мен аулаларды су басады. Қалада барлығы осындай 56 учаске бар. Барлық дерлік коллекторлық желі нашар жағдайда екені анықталды. Сондықтан негізгі жүктеме 2011-2012 жылдары салынған бірнеше арнаға ғана түседі.

Қала билігінің мәліметінше, қазір Алматыдағы 16 коллектордың тек төртеуі ғана жаңбыр суы мен еріген суды ағызады. Өйткені өзгесі толып, қоқыспен бітелген. Олар жақын арада тазаланбақ. Тағы 12-сі түбегейлі қайта жөндеуді қажет етеді.

"Реконструкция болады. Қазір жұмыс жобалау деңгейінде. Наурызбай, Әуезов және Алатау аудандары бойынша жұмыс басталып та кетті. Алматыдағы арық желілері мен нөсер кәрізін қайта құру және салу бойынша жобаға түзету енгізіліп жатыр. 26 шақырым коллекторлық жүйе реконструкциялануға тиіс", - деп хабарлады" Казгипроводхоз " институты кооператив басшысының орынбасары Антон Туренко.

Алдағы уақытта қала билігі барлық арық пен коллекторлық желіні "Eco Almaty"ЖШС бірыңғай операторына беруге ниетті. Компания олардың техникалық жағдайын бақылайды.

"Егер биыл қаражат бөлінсе, келесі жылы 376 шақырым арықты күрделі жөндеуден өткіземіз. Түрксіб және Алатау аудандарында тағы 100 шақырым жол саламыз. Осыдан кейін олардың барлығы коллекторлық желілерге қосылады. Ол кезде көшелерді су баспайды", - дейді Жасыл экономика басқармасы басшысының міндетін атқарушы Серік Әділбаев.