“Барлық қабырғасы сынған”: Медеуде велосипедші автокөлікпен соқтығысты

Фото: Әлеуметтік желіден

ERNUR.KZ. Бүгін, 6 тамызда таңертең Медеуде велосипедші автокөлікпен соқтығысқан кезде ауыр жарақат алды. Спортшы жансақтау бөлімінде жатыр, деп жазады BAQ.KZ.

Қалалық Полиция департаментінің мәліметінше, жол-көлік оқиғасы сағат 08:20 шамасында Медеу ауданында тіркелген.

“ Toyota Camry жүргізушісі солға бұрылғанда велосипедшіні қағып кеткен “, — деді полиция.

Қазіргі уақытта оқиға бойынша тергеу жұмыстары жүргізілуде.

Велосипедшілер мен триатлеттер қауымдастығының мәліметінше, зардап шеккен адам – тәжірибелі атлет, триатлет.

“ Соққы соншалықты қатты болған, тіпті зардап шеккен адамның барлық қабырғасы сынған, сондай-ақ ішкі органдары өкпе, бауыр, көкбауыр мен қуығы зақымданған. Оның жағдайы әлі де ауыр күйде қалып отыр “, – деп хабарлады қауымдастық мүшелері.

Ал Денсаулық сақтау басқармасы пациент ауыр кешенді жарақатпен Орталық қалалық клиникалық ауруханаға түскенін хабарлады.

“ Жедел операция жасалды. Қазіргі уақытта науқас жансақтау бөлімінде, жағдайы ауыр" – деді дәрігерлер.