Енді ірі қалалардан жер алғандар аукционнан түскен табыстың бір бөлігін бюджетке береді

05.03.2025 11:09

210

Астана, Алматы, Шымкент сияқты қалаларда игерілмеген жер телімдерін аукцион арқылы сатудың тәртібі өзгереді.

Фото: БҚО Жер қатынастары басқармасы

ERNUR.KZ. Бұл туралы Мәжілісте астана мен республикалық маңызы бар қалаларды дамытуға арналған заң жобасын таныстырған Премьер-министрдің орынбасары – Ұлттық экономика министрі Серік Жұманғарин айтты, деп жазады inform.kz.

"Заң жобасының екінші бағыты жер мәселелерін реттеуді көздейді. Қолданыстағы тетік бойынша жер учаскелерін талапқа сәйкес игермеген бұрынғы иелері еншілес (афилирленген) тұлғалар арқылы жерді аукцион арқылы сатып алып, өзінде сақтап қалады. Оған қоса аукционнан келген ақша да сол тұлғаға түседі. Бұдан басқа Жер кодексіне сәйкес игерілмеген жер учаскесі аукционнан өткізілмеген жағдайда арнайы жер қорына есептеледі және оны одан әрі пайдалану мүмкіндігі жоқ, — деді вице-премьер.

Бұл мәселелерді шешу үшін Жер кодексіне мынандай өзгеріс енгізу ұсынылып отыр:

— орталық уәкілетті органға меншіктегі заңсыз жер учаскелерін қайта ресімдеу тәртібін айқындау құзыретін беру;

— бұрынғы меншік иесіне оны сатып алу құнын ғана өтей отырып, қайтарылған жерлерді өткізуден түскен айырма табысты бюджетке жіберу;

— бұрын алынған және елді мекенді дамытуда пайдалану үшін арнайы жер қорындағы жерлерді қолдану;

— бұрын алынған жерлерді қала құрылысы қызметіне тарту мүмкіндігін кеңейту.

Бұған дейін Алматы әкімі Ерболат Досаев тұрғындарды бюджет қаржысына сатып алынған бір сотық жер де жекеменшікке өтпейтініне сендірген еді.