Іле Алатауы тауларында үш турист құтқарылды

Іле Алатауы тауларында үш турист құтқарылды, деп хабарлайды ERNUR.KZ.

ҚР Төтенше жағдайлар министрлігінен хабарлағандай, 25 наурызда таңертең екі жас жігіт пен бір қыз Өткел – Жусалы шатқалы – Үлкен Алматы көлі бағыты бойынша тауға шыққан.

«Сол күні сағат 14:30-да туристердің бірі Ақтау қаласында тұратын ағасына қоңырау шалып, олар Алма-Арасан көздеріне жетпегенін, бағытын басқа жаққа өзгертіп, байланыс болмағанын айтқан. Ал 26 наурызда сағат 00:10-да РЖҚЖ көмекке шақырылды», - делінген ТЖМ хабарламасында.

Туристерді іздеу жұмыстары түні бойы жүргізілді.

«Сағат 9:40-та РЖҚЖ құтқарушылары Өткел шатқалынан зардап шеккендерді тапты. Медициналық көмекке мұқтаж емес. Құтқарушылар әрқашан жақындарыңызға немесе туыстарыңызға жүретін бағытыңыз бен қайтар уақытыңызды ескерту керек екенін еске салады», - делінген хабарламада.