​Күн сайын кәмелетке толмағандар арасында шамамен 5 қылмыс жасалады - Динара Зәкиева

0
290

Күн сайын елімізде кәмелетке толмағандар арасында шамамен 5 қылмыс анықталып отырады.


​Күн сайын кәмелетке толмағандар арасында шамамен 5 қылмыс жасалады - Динара Зәкиева

Фото: Instagram/zakiyevadinara

ERNUR.KZ. ҚР Бала құқықтары жөніндегі уәкіл Динара Зәкиева мектеп оқушылары арасындағы қатыгездік оқиғаларына қатысты пікір айтты, деп жазады inform.kz.

- Күн сайын елімізде кәмелетке толмағандар арасында шамамен 5 қылмыс анықталып отырады. Балалар арасында қылмыстардың жасалуы себебіне тоқталсақ, олар негізінен буллингке, ұрлық, сондай-ақ экономикалық сипаттағы әрекеттерге қатысты. Бұл ретте, осыған ықпал еткен факторларға назар аударсақ, осы балалар ата-анасының назарынан немесе қамқорлығынан тыс қалған. Мұнымен қоса, өздері зорлық-зомбылық көрген және осындай оқиғалардың куәгері болған жеткіншектер де кейіннен заңсыз әрекеттерге барып жатады. Сондықтан қабылданған заңға сәйкес, алдын алу іс-шаралары қарастырылған. Осы орайда құрылған мобильді топтарға қиын жағдайдағы отбасыларды, зорлық-зомбылық әрекеттері бар отбасыларды анықтау міндеті жүктелген. Мәселен, маусым айынан бері 45 мың отбасы анықталып, 1800 отбасы жан-жақты сүйемелдеу жұмыстарымен қамтылып отыр, - деді Д.Зәкиева Парламент Мәжілісінде тілшілер сұрағына жауап бере отырып.

Оның айтуынша, отбасыларды қолдау орталықтары ашылды. Қазір өңірлерде осындай 112 орталық жұмыс істеп тұр, енді тағы 109-ы іске қосылады.
- Сондықтан аталған профилактикалық нормалар отбасылармен жұмыста маңызды рөл атқарады. Екіншіден, қыркүйек айынан бері мектептерде қауіпсіздік сабағы енгізілді. Бұл сабақта 130 тақырып қамтылған. Олардың ішінде балаларға жауапкершілік мәселесі түсіндіріледі, - деді Бала құқықтары жөніндегі уәкіл.