«ТАЗА ҚАЗАҚСТАН»: 2 мыңнан астам бәйдібектік тазалық жұмыстарына атсалысты

Бәйдібектегі жалпыаудандық тазалық жұмыстарына 2 мыңнан астам адам атсалысып, 87 мың тонна қоқыс шығарылды, деп хабарлайды ERNUR.KZ.

«Наурызнама» онкүндігі аясында 19 наурыз – Жаңару күні болып белгіленген. Осыған орай, бүгін Бәйдібек ауданында жалпыаудандық экологиялық акция ұйымдастырылды. Аталған шараға Бәйдібек ауданының әкімі Ерлан Нұрмаханов, дербес бөлімдер мен мекеме басшылары, ауылдық округ әкімдері және аудан тұрғындары белсене қатысты.

Аудан басшысы Шаян елді мекеніне кіреберіс, ішкі көшелерін және өзен жағаларын аралап, тазалық және абаттандыру жұмыстарын бақылады. Аудан тұрғындарын экоакцияларға белсене қатысуға, қоршаған ортаны таза ұстауға шақырды.

Аудан көлемінде ұйымдастырылған тазалық жұмыстарына барлық елді мекендер бойынша 19 техника тартылып, 2 мыңнан астам адам атсалысты. Нәтижесінде 2500 түп ағаш отырғызылып, 87 тонна қоқыс шығарылды.

Айта кетейік, Түркістан облысында көктемгі ағаш егу және тазалық шаралары үздіксіз жүргізіліп жатыр. Биыл облыста 1,2 млн ағаш отырғызу жоспарланса, оның ішінде 631 түп ағашты көктем мезгілінде отырғызу көзделіп отыр. Бүгінгі таңда аудан, қала аумағында 415 мыңнан аса түп ағаш отырғызылып, су жүйелерімен қамтамасыз етіліп, қоршау жұмыстары жүргізілуде.