ТҮРКІСТАН: Ордабасыда жер қойнауын заңсыз пайдаланушыларға қарсы жұмыс күшейтілді

Ордабасы ауданының жер қойнауын заңсыз пайдалану фактілерін анықтау мақсатында арнайы мобильдік топ құрылған, деп хабарлайды ERNUR.KZ.

Түркістан облысы, Ордабасы ауданының жер қойнауын заңсыз пайдалану фактілерін анықтау мақсатында арнайы құрылған мобильдік топ жүйелі түрде рейдтік шаралар ұйымдастырып келеді.

Аудан әкімі Азат Оралбаевтың өкімімен құрылған жұмысшы топ Ордабасы аудандық полиция бөлімімен бірлесіп, Бадам және Қараспан ауыл округтерінде кезекті рейдтік іс-шараларын жүргізді. Нәтижесінде жүк көліктерінің жол құжаттары тексеріліп, анықталған заңсыздықтар бойынша хаттамалар толтырылды. Саз топырақ пен құмды қиыршық тас тиеген көліктердің үстін арнайы жабу, артық салмақта шикізат артпау секілді заңсыздықтардың алдын алу шаралары бойынша түсіндіру жұмыстары жүргізілді.

Қазіргі уақытта аудан аумағында 33 жер қойнауын пайдаланушы бар. Оның ішінде, 13 жер қойнауын пайдаланушы келісімшартпен, 20-сы лицензиямен жұмыс атқаруда. Ал сазды топырақ өндірушілер саны – 21. Олардың ішінде, төртеуінің барлауға рұқсаты бар. Тау-кен саласында құмды қиыршық тас өндірушілердің жалпы саны – 12.

Айта кетейік, 2024 жылы мобильдік жұмысшы топпен жүргізілген 14 рейдтік іс-шарада 4 заң бұзушылық анықталып, нәтижесінде 2023 жылмен салыстырғанда заңсыздық 74%-ға төмендеді. 2023 жылы жұмысшы топпен 28 рейдтік іс-шара жүргізіліп, 26 заң бұзушылық тіркелген. Бұл бағыттағы жұмыстар жалғасады.