Түркістанда «Күміс әшекейлер: дәстүр мен өрнек» көрмесі ашылды

Түркістанда «Күміс әшекейлер: дәстүр мен өрнек» тақырыптық көрмесі ашылды, деп хабарлайды ERNUR.KZ.

2025 жылғы 2 сәуір күні «Әзірет Сұлтан» Ұлттық тарихи-мәдени музей-қорығының ұйымдастыруымен «Күміс әшекейлер: дәстүр мен өрнек» тақырыптық көрмесі ашылды.

Көрмені «Әзірет Сұлтан» Ұлттық тарихи-мәдени музей-қорығы директорының ғылыми жұмыстар жөніндегі орынбасары Тастанбеков Мұрат Мейірбекұлы ашып, келушілергі музей және көрме жайлы ақпарат берді. Қолөнер шебері, ҚР Шеберлер одағының мүшесі Әбдіреим Сұлтанғали Темірұлы, Түркістан Ахмет Ясауи колледжінің оқытушысы Мафтуна Хакимжановна ашылған көрменің жастарға, дизайн мамандығы бойынша білім алатын студенттерге берер өнегесі туралы сөз алды. 22 Б.Момышұлы атындағы жалпы білім беретін мектептің мұғалімі Абуова Гүлраушан әшекей бұйымдардағы ою-өрнектің мәні, заманауи үлгідегі әшекейлерге бейнелеу жайлы сөз қозғады.

Көрменің мақсаты – XIX-ХХ ғасырға тиесілі зергерлік бұйымдар арқылы қазақ халқының көркемдік танымын, ұлттық нақыш пен өрнек әлемін, сол дәуірдегі сұлулық пен қолөнер мәдениетінің даму деңгейін көрсету. Күмістен жасалған әшекейлер сол заманның шеберлік деңгейін, эстетикалық талғамын және тұрмыс-тіршілігін айқын сипаттайды.

Көрмеде қазақ халқының ұлттық зергерлік өнерінің нәзік үлгілерін көрсететін 200-ден астам күміс бұйым – сақина, білезік, сырға, шашбау, алқа, тұмарша, қапсырма сынды алуан түрлі әшекейлер көпшілік назарына ұсынылды. Әшекейлердің әрқайсысы – халқымыздың тарихын, салт-дәстүрін, зергерлік бай мұрасын айшықтайтын құнды мәдени мұралар.

Зергерлік бұйымдардың бір бөлігі XIX-ХХ ғасырларға тиесілі, Оңтүстік Қазақстан өңірінде жасалған. Бұл туындыларда тек сәндік элементтер ғана емес, сонымен қатар ұлттық таным мен дүниетанымның символдық мәні де сақталған.

Көрме экскурсиясын Мәдени іс-шара ұйымдастырушы Хадиша Тимурқызы жүргізіп, келушілерге көрмені таныстырды. Көрме жұмысы бір айға жалғасады.