Спортпен ТЕК ДЕМАЛЫС КҮНІ айналысу – ТИІМДІРЕК

Көптеген адамдар спортпен шұғылдануды аптаның барлық күніне теңдей бөліп немесе араға күн сала отырып айналысуға тырысады. Өйткені осылай жасағанда ғана максималды пайда алуға болады деп санайды. Бірақ іс жүзінде жұмыс күндері қызмет пен спортты ұштастыру қиынға соғады. Салдарынан жаттығулар кейінге шегеріліп, ақыр соңында мүлде жасалмай қалады.

Осыған жол беріп, спортты өміріңізден мүлде алшақтатып алғанша, жұмыс күндері жұмыс істеп, жаттығуда сенбі-жексенбіге қалдырған абзал. Бұл көпшілік ойлағандай бұрыс жоспар не зиянды әрекет емес.

Ғалымдардың айтуынша...

Жұмыс күндері спортпен айналысуға уақыты жоқтар үшін өте жақсы жаңалық. Соңғы зерттеулерде спортпен тек демалыс күндері айналысу апта ішінде күнделікті жаттығу жасаумен бірдей нәтиже береді деген тұжырым жасалды. Физикалық белсенділіктің апта күндеріне қалай бөлінгені емес, жаттығулардың жалпы көлемі маңыздырақ екен. Дүниежүзілік денсаулық сақтау ұйымы ересектерге аптасына 150 минут орташа физикалық белсенділік (мысалы, жеңіл жүгіру, йога, аэробика, т.с.с.) немесе 75 минут интенсивті жаттығулар (мәселен, кроссфит, күш жаттығулары, белсенді спорттық ойындар, т.б.) жасауды ұсынған. Осы көлемді сенбі-жексенбіде орындау аптаның басқа күндерінде бөліп жасаудан еш кем емес екенін дәлелдеді.

Аптасына төрт рет жарты сағаттан жаттығу жасау мен сенбі-жексенбіде бір жарым сағаттан екі рет жаттығудың тиімділігі бірдей. Жүрек-қан тамырлары аурулары мен өлім қаупі екі жағдайда да төмендейді.

Артықшылықтары

Спортпен айналысуды демалыс күндеріне қалдырудың бірқатар ыңғайлы тұсы бар.

Психологиялық жайлылық

Демалыс күндеріндегі спорт – тек физикалық жүктеме ғана емес. Оны табиғат аясында серуендеу, таза ауада уақыт өткізу, достарымен кездесіп, сүйікті хоббилерімен айналысу сияқты істермен ұштастырып, түрлендіруге болады. Бұл жаттығуларды қызықты етіп, оларды жалғастыруға ынталандырады. Осылайша екі оқпен бір қоян атасыз. Әрі физикалық әрі психологиялық жай-күйіңіз айтарлықтай жақсарады.

Шаршауды азайту

Егер жаттығулар арасында ұзақ үзіліс болса, ағза толық қалпына келеді. Бұл тым жиі жаттығулар кезінде туындайтын күйзеліс пен жарақат алу қаупін төмендетеді. Әсіресе 40 жастан асқан адамдарға қатысты, себебі олардың ағзасына қалпына келу үшін жастарға қарағанда әлдеқайда ұзағырақ уақыт керек.

Уақыт үнемдеу

Жұмыс немесе әлеуметтік кестесі тығыз адамдар үшін аптаның ішінде жаттығуларға уақыт бөлу қиын. Демалыс күндері спортпен шұғылдану стрессті азайтады. Жұмыс пен демалыс арасындағы тепе-теңдікті жақсартуға көмектеседі. Оған қоса, дүйсенбі мен жұма аралығында жаттығуға уақыт таппағаныңыз үшін және демалыс күндері физикалық белсенділіктің болмағаны үшін өзіңізді айыптау сезімінен арыласыз.

Қалай ұйымдастыру керек?

Әр түрлі жаттығуларды таңдаңыз

Кардио жаттығуларын (жүгіру, жүзу) күш жаттығуларымен (тренажерлар, өз дене салмағымен жаттығулар) біріктіріңіз. Бұл төзімділікті дамытуға және бұлшықеттерді бір уақытта нығайтуға көмектеседі.

Жылыту мен қалпына келтіруге мән беріңіз

Бұл жаттығулардың жоғары интенсивтілігіне байланысты. Жаттығуларға дейін бұлшықеттерді жақсылап жылыту және жаттығудан кейін созылу өте маңызды.

Қарқынды бақылауда ұстаңыз

Демалыс күндері жаттығуларды жиі жасамасаңыз да, жоғары деңгейде жүктеме жасауға тырысыңыз. Бірақ артық кетпеңіз. Жарақат алу қаупін тудырмау үшін шаманы сақтау маңызды.

Белсенді демалыс қосыңыз

Егер спортзалмен шектелгіңіз келмесе, белсенді демалыс түрлерін қолданыңыз: велосипедпен жүру, жаяу серуендеу, шаңғымен немесе конькимен жүру немесе табиғатта йога — маусымға байланысты. Бұл физикалық белсенділікті әртараптандыруға көмектеседі.

Әрине, бұл барлық адам енді осылай жасасын деген нұсқау емес. Егер сізге спортпен күнара айналысу ыңғайлы болса, бұған уақыт бөліп жүрсеңіз, дәл солай жалғастыра беріңіз.

Дайындаған: А. БЕКТҰРҒАНОВА,

ERNUR.KZ

ОҚИ ОТЫРЫҢЫЗ:

МҰНЫ ЖАСАСАҢЫЗ, сізде мойын ОСТЕОХОНДРОЗЫ БОЛМАЙДЫ