Елімізде заңсыз немесе жалған IMEI коды бар смартфондар бұғатталып, байланыс пен интернеттен ажыратылады.
ERNUR.KZ. Қазақстанда 24 наурыздан бастап мобильді құрылғыларды тіркеудің жаңа ережелері күшіне енеді, деп жазады BAQ.KZ.
Елімізде заңсыз немесе жалған IMEI коды бар смартфондар бұғатталып, байланыс пен интернеттен ажыратылады. Қазақстанның Ішкі істер министрлігі (ІІМ) смартфондардың бұғатталуына қатысты маңызды ақпарат таратты.
“Енді смартфондар IMEI-код арқылы тексеріледі. Егер сіздің телефоныңыз “қара тізімде” болса, ол жұмысын тоқтатады. Байланыс, интернет және басқа да мобильді қызметтер істен шығады,” – деп хабарлады ІІМ баспасөз қызметі.
Сондықтан смартфонды тек ресми сатушылардан немесе сенімді дүкендерден сатып алу қажет. Бұл жалған IMEI коды бар құрылғыны алып қою тәуекелін азайтады. Сатып алмас бұрын IMEI кодын тексеру керек. 24 наурыздан бастап IMEI-кодты алдын ала тексеру қызметі іске қосылады. Кодты арнайы сервиске енгізіп, оның заңдылығына көз жеткізуге болады. Қолдан немесе күмәнді сайттардан смартфон алмау ұсынылады. Мұндай құрылғылар заңсыз әкелінуі мүмкін, сондықтан бұғатталу қаупі жоғары.
Бұрын сатып алынған смартфондар не болады?
Егер сіз 2025 жылдың 24 наурызына дейін сатып алынған смартфонды қолдансаңыз және оның IMEI-коды тіркелген болса, еш уайымдамауға болады – ол жұмыс істей береді.
Бұл шара заңсыз жолмен әкелінген смартфондармен күресуге, тұтынушылардың құқықтарын қорғауға, мобильді құрылғыларды пайдалану қауіпсіздігін қамтамасыз етуге бағытталған.
Сонымен қатар, бұл өзгеріс ұялы телефон ұрлығын және алаяқтықты азайтуға көмектеседі.
Криминалдық полиция департаментінің мәліметінше, 2024 жылдың басынан бері елде 474 ұялы телефон ұрлығы тіркелген. Бұл былтырғы кезеңмен салыстырғанда 38,4%-ға төмен. 2023 жылы 770 телефон ұрлығы тіркелген болатын.
Құқық қорғау органдары осындай қылмыстардың азаюына профилактикалық жұмыстар мен ұрланған құрылғыларды тез анықтау шаралары әсер еткенін атап өтті.
