ТЕРІС қарап жүру ТІЗЕҢІЗДІ аурудан құтқарады

0
666

Бірақ алдымен дәрігерден рұқсат сұраңыз


ТЕРІС қарап жүру ТІЗЕҢІЗДІ аурудан құтқарады

Расында да теріс қарап жүру денсаулыққа пайдалы екен. Оны физикалық терапияда біршама жайсыздықтарды шешу үшін қолданады. Әсіресе, физиотерапевтер пациенттің жағдайын, атап айтқанда, оның тепе-теңдікті сақтауы мен қозғалыс координациясын бағалау үшін сынақ ретінде теріс қарай жүргізеді.


Тізеге түсетін қысымды азайтады

Артқа теріс қарап жүрген кезде адамдар қысқарақ қадам жасайды. Тізесін аз бүгеді, аяқты сртқа қарай алшаң баспайды. Мұның бәрі тізе буынына түсетін жүктемені азайтады.


Тепе-теңдікті сақтауға дағдыландырады

Қытай зерттеушілері инсульт алған науқастарды қалпына келтіру бағдарламасы барысында тәжірибе жасап көрді. Нәтижесінде аптасына үш рет 30 минуттан кері жүру инсульттан кейінгі науқастарға тепе-теңдік сезімін қалпына келтіруге, аяқтың жұмысын және қозғалыс жылдамдығын жақсартуға көмектескені белгілі болды. Дені сау адамдарда да теріс қарап жүру тепе-теңдікті жақсы сезінуіне оң әсер еткенін көрсететін шағын зерттеу бар.


Арықтауға әсері бар ма?

Теріс қарап жүру арқылы қысқарақ және жиірек қадам жасайсыз, сонымен қатар жүру кезінде әдеттегіден басқа бұлшықеттерді пайдаланасыз. Мұның бәрі миға және бұлшықеттерге жүктемені арттырады. Нәтижесінде әдеттегі жаттығулардан көрі көбірек энергия, калория жұмсауға тура келеді. Сондықтан, жаяу жүру жаттығуын жасар болсаңыз, оны теріс қарай жүріп жасаңыз, сонда әсерлірек.


Зияны болмай ма?

Дені сау адамға теріс қарап жүрудің айтарлықтай зияны бола қоймас. Ал тепе-теңдікті сезінуіңіз қиын болса, аяғыңызда белгілі бір дерт не жарақат болса, қандай да бір ауыр сырқаттан кейінгі қалпына келтіру кезеңінде жүрген болсаңыз, өз бетіңізбен жасамауға кеңес берер едік. Алдымен дәрігермен кеңесіп, рұқсат сұраңыз. Жасауға болады десе, қолыңызға таяқ сүйеніп алған абзал және жылдамдықты да дұрыс басқарыңыз. Әйтпесе, құлап, тағы бір жарақат алу не ауруды асқындыру қаупі бар.


Қалай жасалады?

  • Жүгіру жолағындағы мониторға теріс қарап тұрыңыз. Егер жаттықтыру аппаратында қауіпсіздік кілті болса, оны киіміңізге қыстырып қойыңыз.
  • Алдымен ең төменгі жылдамдықты қосыңыз да, тіреуіштерден ұстап тұрып, артқа қарай қадам басуды бастаңыз.
  • Табанды жерге қоярда алдымен саусақтарды тигізіп, сосын барып өкшені түсіріңіз. Тізені барынша ашуға тырысыңыз, бірақ толық ашу міндетті емес.
  • Өзіңізді сенімді сезіне бастаған кезде жылдамдықты келесі сатысына көтеруге болады.
  • Бастапқыда 3км/сағ жылдамдықпен 5-10 минут жүру жеткілікті. Кейінірек жылдамдықты 5-6 км/сағ арттырып, жүру уақытын 30 минутқа дейін созуға болады.

Аударған: А. Бектұрғанова,

ERNUR.KZ

ОҚИ ОТЫРЫҢЫЗ:

ЙОГА ЖАТТЫҒУЫ немесе қазақтың МАЛДАС ҚҰРУЫНЫҢ қандай пайдасы бар?