Ақтаудағы ұшақ апатына байланысты Баку әуежайындағы жаңа жылдық шырша алып тасталды (видео)

Гейдар Әлиев атындағы Баку әуежайында Қазақстанның Ақтау қаласында болған ұшақ апатына байланысты мерекелік жаңа жылдық шыршаны алып тастау туралы шешім қабылданды.

Әзірбайжандық БАҚ-та шыршаны жинау сәтінің видеосы жарияланды. Апатқа ұшыраған “Azerbaijan Airlines” әуе компаниясының ұшағы осы Баку әуежайынан ұшқан.

Еске салсақ, Ақтау маңында Бакуден Грозныйға ұшып бара жатқан "Azerbaijan Airlines" әуе компаниясына тиесілі жолаушылар ұшағы құлағаны туралы жазған едік. Желіде ұшақтың ішінде апатқа дейін және кейін түсірілген видеолар пайда болды.

Қазір апат болған Түпқараған ауданында жергілікті ауқымдағы төтенше жағдай жарияланды. Ұшақ апатынан 38 адамның қаза тапқаны белгілі болды.